Թուրքիայի Եվրամիության հարցերով նորանշանակ նախարար Ալի Հայդար Քոնջան դարձել է թուրքական ազգայնական շրջանակների ԶԼՄ-ների թիրախն այն բանի համար, որ հրապարակայնորեն ճշմարիտ դիրքորոշում է հայտնել Հայոց ցեղասպանության հարցով:
Թուրք նախարարը Ցեղասպանության հարցում դիրքորոշման համար վերածվել է թուրքական ԶԼՄ-ների թիրախի
ՍՏԵՓԱՆԱԿԵՐՏ, սեպտեմբերի 1, ԱՐՑԱԽՊՐԵՍ։ Ալի Հայդար Քոնջան Թուրքիայի խորհրդարանում 80 պատգամավորական աթոռներ զբաղեցնող քրդական Ժողովուրդների դեմոկրատական կուսակցության (ԺԴԿ) անդամ է:
Թուրքական ազգայնական շրջանակների մի շարք ԶԼՄ-ներ դատապարտել են Քոնջային Օսմանյան կայսրության փլուզման շրջանում հայերի դեմ իրագործված կոտորածներն իրենց անունով կոչելու համար:
ԺԴԿ-ն ներկայացնող Թուրքիայի ԵՄ հարցերով նախարար Քոնջան Հայոց ցեղասպանության հարցում իր դիրքորոշումն, ըստ «Ակոս»-ի, ներկայացրել է այսպես. «Ակնհայտ է, որ կոտորած եղել է: Դա բոլորն են ընդունում: Ըստ էության` ժխտող էլ չկա: Հիմնական հարցը դրա բնութագրման մեջ է: Այս հարցը մեր կուսակցության հետ կքննարկենք եւ կհստակեցնենք միասնաբար ընդունված որոշման վերաբերյալ մեր տեսակետը»:
Մասնավորապես, թուրքական իշխանամետ «Սաբահ» թերթն այս առնչությամբ գրել է, որ նախարար Քոնջան «չափերն անցել է» Հայոց ցեղաասպանությանը վերաբերող հարցին պատասխանելիս:
Թուրքիայում արդեն կոչեր են հնչում մինչեւ նոյեմբերի 1-ին անցկացվելիք խորհրդարական ընտրություններ ժանակավոր կառավարության կազմում ընդգրկված երկու քուրդ նախարարներին պաշտոնանկ անելու մասին` նրանց կողմից Հայոց ցեղասպանությունը եւ քրդերի ինքնությունն ու իրավունքները Թուրքիայում ճանաչվելու մասին արած հայտարարությունների համար:
ԺԴԿ համանախագահ Սալահեթդին Դեմիրթաշը Թուրքիայում անցկացված նախագահական ընտրությունների նախընտրական քարոզարշավի ընթացքում հանդես էր եկել հայտարարությամբ, որ ընտրվելու դեպքում կճանաչի Հայոց ցեղասպանությունը:
Հայոց ցեղասպանությունը պաշտոնապես ճանաչել են աշխարհի 24 պետություններ, բազմաթիվ միջազգային հեղինակավոր կազմակերպություններ: Հայոց ցեղասպանության ժխտումը քրեականացնող օրինագիծ ընդունել են Հունաստանի, Շվեյցարիայի, Սլովակիայի եւ Կիպրոսի Հանրապետության խորհրդարանները:
