Եվրոպայի հայերի համագումարի համերաշխության կոչ է ուղղել, որտեղ կոչ է անում Եվրոպայի հայերին օգնել ժամանող գաղթականներին, քանի որ ժամանակին արաբական երկրներն տանիք են տվել հայ գաղթականներին:
Եվրոպան, գաղթականությունը եւ մենք՝ հայերս. Եվրոպայի հայերի համագումարի համերաշխության կոչը
ՍՏԵՓԱՆԱԿԵՐՏ, սեպտեմբերի 14, ԱՐՑԱԽՊՐԵՍ: NEWS.am-ի փոխանցմամբ` կոչում, մասնավորապես, ասվում է.
«Հեռուստաալիքներն ու մամուլը ցնցող տեսարաններ եւ լուսանկարներ են հրապարակում: Խեղդված, սառած մարմնով մանկանց դիակներ, հուսահատ մարդիկ, որոնք իրենց եւ զավակների կյանքը վտանգելով փորձում են պատերազմից փախչել եւ հեռանկար գտնել խաղաղ եւ ապահով երկրներում:
Բռնագաղթն ու գաղթականությունը հայերիս համար նորություւն չեն, մենք ապրել ենք ու տակավին ապրում ենք այդ ցավով: Դարերի խորքից մինչեւ Սեֆեւյան Շահ Աբասի միջոցով իրականացված Նախիջեւանի եւ Վասպուրականի հայության բռնագաղթը, մինչեւ 1915-ի սեւ օրերն ու մինչեւ մերօրյա Հայաստանից չդադարող դառն արտագաղթը...
Բռնի, կամ բռության ու անարդարության արդյունքում իրականացվող, արտագաղթերը միշտ էլ ունեցել են իրենց պատճառները՝ Լիբանանի քաղաքացիական պատերազմը, Իրանի հեղափոխությունը, Իրան-Իրաք երկարամյա պատերազմը եւ այս օրերին հայաստանյան իրականությունը դրանց լավագույն օրինակներն են:
Մեծ Եղեռնի օրերին, մեր մեծ մայրերն ու մեծ հայրերը քայլեցին ու բնաջնջվեցին Միջին Արեւելքի նույն այն վայրերի մեջ, մասնավորապես Հալեպ, Սիրիա ու Իրաք, ուր այսօր դարձյալ վայրագության, ատելության ու քանդումի թատերաբեմ է դարձել:
Մեծ եղեռնի օրերին, արաբ ժողովուրդն էր, որ ընդունեց հայությանը, մեզ տվեց ապրելու, բարգավաճելու հնարավորություն: Դա բնավ պետք չէ մոռանալ: Այսօր նույն արաբ ժողովուրդը վերածվել է գաղթականի եւ մեր նեցուկի կարիքն ունի: 1915-ի Մեծ Եղեռնի ժամանակ էլ գաղթականներն անցան Հունաստան եւ Ֆրանսիա: Այդ գաղթականների զավակներից էին աշխարհահռչակ երգիչ Շարլ Ազնավուրը, բեմադրիչ Անրի Վերնոյը եւ ուրիշներ:
Մենք, որպես Եվրոպայի հայերիի համագումար, կոչ ենք ուղղում եվրոպաբնակ յուրաքանչյուր հայի եւ յուրաքանչյուր եվրոպահայ կազմակերպության, հանուն մարդասիրության, օգնել այս գաղթականներին եւ ծառանալ ցեղապաշտության ու կրոնական այլամերժության զազրելի գաղափարախոսության ու այդ ենթահողերի վրա իրականացվող խտրականության դեմ:
Այս ուղղությամբ Եվրոպայի հայերի համագումարը ծրագրեր է մշակում, որոնց մասին շուտով տեղեկատվություն կտարածի, քանզի դրանց իրականացման համար բոլորի համատեղ ջանքի, միասնական աշխատանքի և համագործակցության կարիքը պիտի զգա:
Պետք չէ մոռանալ, որ մեզնից շատերը գաղթականների թոռներ ու նաեւ նորօրյա գաղթականներ են»: