«Վերջին բնակիչը» ֆիլմը ստեղծվել է գրող Ծովինար Խաչատրյանի «Գյուրջևանի վերջին բնակիչը» պատմվածքի հիման վրա:
«Վերջին բնակիչը» ֆիլմի առաջնախաղն Արցախում չի ուշանա. ռեժիսոր
ՍՏԵՓԱՆԱԿԵՐՏ, դեկտեմբերի 14, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում նշել է վերջերս Արցախում նկարահանված «Վերջին բնակիչը» ֆիլմի ռեժիսոր Ջիվան Ավետիսյանը՝ մանրամասնելով, որ այն իրական պատմություն է հայկական գյուղի տեղահանությունից հետո իր ծննդավայրում թշնամու կողմից շրջապատման մեջ հայտնված հայի մասին:
«Նախընտրեցինք չհեռանալ պատմվածքի վերնագրից՝ ֆիլմը կոչելով «Վերջին բնակիչը», քանի որ դեպքերը կարող են տեղի ունենալ ցանկացած գյուղում կամ քաղաքում, ցանկացած ժողովրդի հետ: Ֆիլմը կոնֆլիկտի մասին է, որը համակում է տարբեր պետությունների միլիոնավոր մարդկանց: Այն ընկերության, սիրո և նրանից ծնվող ինքնազոհողության մասին է: Դա հույս է տալիս, որ հակամարտություններից բզկտվող աշխարհում կյանքը կշարունակվի: Ամեն դեպքում, իմ կարծիքով, ինչ ցանկանում էի ներկայացնել, ստացել ենք: Մնացածն արդեն կտեսնի և կգնահատի հանդիսատեսը:»,-ասել է Ջ. Ավետիսյանը և հավելել, որ ֆիլմում նկարահանվել են 3 տասնյակից ավելի դերասաններ` ներառյալ երկրորդական, երրորդական, էպիզոդային դրվագներում հանդես եկող կերպարները:
Ռեժիսորի խոսքով, հայտնի հայ դերասաններից բացի ֆիլմում նկարահանվել են նաև մեծ ճանաչում ունեցող դերասաններ՝ Իրանից, Լիտվայից, Հունաստանից,ԱՄՆ-ից և Ռուսաստանից: Ֆիլմն այժմ հետարտադրական աշխատանքների փուլում է, և պատկերի, ձայնի, երաժշտության ամբողջական ավարտից հետո արդեն հնարավոր կլինի իմանալ, թե ինչպիսի արձագանք կունենա այն:
Այն հարցին, թե առաջիկայում նախատեսվո՞ւմ է արդյոք Արցախի մասին պատմող նոր ֆիլմի նկարահանում, ռեժիսորը պատասխանել է, որ աշխատանքներ դեռ շատ կան անելու, և նոր ծրագրերի մասին խոսելու առիթներ դեռ շատ կլինեն:
«Ֆիլմի նկարահանումներն իրականցրել ենք Արցախում, իմ հայրենի գյուղում` Խաչմաչում: Անսահման շնորհակալ եմ Խաչմաչի գյուղապետ Մխիթար Ղահրիյանին, դպրոցի տնօրեն Սերոբ Մնացականյանին, իմ համագյուղացիներին` ջերմ, մարդկային վերաբերմունքի, ընկերական մթնոլորտի, ամենօրյա հետաքրքրվածության համար»,- ավելացրել է Ջ. Ավետիսյանը և ընդգծել, որ «Վերջին բնակիչը» ֆիլմի առաջնախաղն Արցախում չի ուշանա:
Նշենք, որ ֆիլմի կոմպոզիտորը հանրաճանաչ հայազգի երաժիշտ Սերժ Թանկյանն է:
