ԼՂՀ կառավարության նախաձեռնությամբ նախօրեին Մարտակերտի շրջան այցելած լրագրողներն եղել են Կաշենի հանքավայրում, որտեղ «Բեյզ-մեթըլս» հանքարդյունաբերական փակ բաժնետիրական ընկերության գործադիր տնօրեն Արթուր Մկրտումյանը ներկայացրել է բացահանքի հանքահումքային հնարավորությունները և շահագործման հետ կապված խնդիրներն ու ձեռքբերումները։
Կաշենի հանքավայրի շահագործման համար նախատեսվում է 136 մլն դոլարի ներդրում
ԼՂՀ կառավարության նախաձեռնությամբ նախօրեին Մարտակերտի շրջան այցելած լրագրողներն եղել են Կաշենի հանքավայրում, որտեղ «Բեյզ-մեթըլս» հանքարդյունաբերական փակ բաժնետիրական ընկերության գործադիր տնօրեն Արթուր Մկրտումյանը ներկայացրել է բացահանքի հանքահումքային հնարավորությունները և շահագործման հետ կապված խնդիրներն ու ձեռքբերումները։
«Արցախպրես»-ի հաղորդմամբ, լրագրողների հետ զրույցում Ա. Մկրտումյանը նշեց, որ նախանցած ամիս վերամշակվել է 62 հազար տոննա հանքաքար։ Տնօրենի խոսքով՝ բաց եղանակով շահագործվող Կաշենի հանքի պաշարները, հաստատված նախնական տվյալների համաձայն, կազմում են 56 մլն տոննա։
«Ակնկալիքներ ունենք , որ հետազոտություններից հետո այդ ծավալներն ավելին են լինելու։ Ներկայումս իրականացվել է մոտ 11 մլն տոննա դատարկ ապարների մակաբացում, իսկ մոտ 5-6 մլն տոննա ապարների մակաբացումից հետո հասել ենք հանքաքարին։ Զուգահեռ աշխատանքներ են տարվում գլխավոր բացահանքի մակաբացման ուղղությամբ»,-ասաց Ա. Մկրտումյանը՝ հավելելով, որ 17-18 մլն տոննա ապարների մակաբացումից հետո տեղում կկազմակերպվեն հանքաքարի վերամշակման աշխատանքները։
Ընկերության գործադիր տնօրենի տեղեկատվությամբ` ներկայումս ընթացքի մեջ են հարստացուցիչ ֆաբրիկայի կառուցման աշխատանքները, որի գործարկման դեպքում նախատեսվում է տարեկան ավելի քան 2 մլն տոննա հանքաքարի հարստացում ապահովել։ Ամբողջ նախագծի իրագործման համար նախատեսված է 136 մլն դոլար ներդրում կատարել։
«Հանքի վերին շերտերը հարուստ են պղնձի պարունակությամբ, ուստի առաջիկա 7-8 տարիների ընթացքում մենք կզբաղվենք պղնձի, իսկ այնուհետև նաև մոլիբդենի արդյունահանմամբ»,- մանրամասնեց Ա. Մկրտումյանը՝ ավելացնելով, որ ներկայումս Կաշենի հանքավայրում աշխատում է 520 մարդ: Ընկերությունում միջին ամսական աշխատավարձը հունիս ամսից կազմում է 230 հազար դրամ։