Կրթության, գիտության և սպորտի նախարարության կողմից սկսվել են ուսուցիչների տասնօրյա նախաատեստացիոն ամենամյա վերապատրաստումները, որին մասնակցում է հանրապետության բոլոր շրջանների հանրակրթական դպրոցների 484 ուսուցիչ:
Արցախում սկսվել են ուսուցիչների նախաատեստացիոն վերապատրաստումները
ՍՏԵՓԱՆԱԿԵՐՏ, 15 մարտի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԼՂՀ կրթության, գիտության և սպորտի նախարարության կրթության և գիտության վարչության պետ Ռայա Մուսայելյանը և նշել, որ ծրագրին մասնակցում են այն ուսուցիչները, ովքեր ունեն առնվազն 3 տարվա աշխատանքային գործունեություն: Ռ. Մուսայելյանի խոսքով՝ հինգերորդ տարին է, ինչ կազմակերպվում են դասընթացներ. դրանք շարունակական բնույթ են կրելու, որպեսզի բոլոր ուսուցիչներն էլ մասնակցեն նախաատեստացիոն վերապատրաստումների:
«Մասնագետները թվով 25 հոգի են, որոնք հրավիրվել են Հայաստանի Հանրապետությունից: Նախաատեստացիոն վերապատրաստումներին մասնակցում է 19 խումբ, յուրաքանչյուր խմբում ընդգրկված է 25-30 ուսուցիչ»,- մանրամասնել է Ռ. Մուսայելյանը:
Երևանի կրթության ազգային ինստիուտի հայոց լեզվի և գրականության մասնագետ Թամարա Թովմասյանը նշել է, որ ինքը երկրորդ անգամ է Ստեփանակերտում և պատրաստակամ է Արցախի ուսուցիչներին մեթոդական օգնություն ցուցաբերելու:
«Մենք սովորեցնելու ենք արդի մեթոդներով աշխատելու ձևերը՝ տեսականն ու գործնականը իրար հետ զուգակցելը՝ այդ ամենը հետագայում դասավանդման ընթացքում օգտագործելու համար: Տալիս ենք մեթոդական օգնություն, գրքեր, ուսումնական նյութեր, նրանց համար կազմակերպում ենք հատուկ խաղեր»,-ասել է Թ. Թովմասյանը:
«Նախաատեստացիոն վերապատրաստումների ընթացքում մենք ծանոթացնում ենք կրթության նոր մեթոդներին, ուսումնական և առարկայական չափորոշիչներին:
Նման մեթոդների կիրառմամբ ավելի հետաքրքիր կդառնան մեր դասերը, կկարողանանք աշակերտներին զինել ավելի կայուն գիտելիքներով»,-ասել է Քաշաթաղի շրջանի Ծիծեռնավանք գյուղի տարրական կրթության և մանկավարժության ուսուցչուհի Սուսաննա Սահակյանը:
