«Մանկական նոր ալիք»-ում այս տարի Հայաստանը ներկայացնող 12-ամյա Դավիթ Վարդանյանը հեղինակավոր մրցույթում զբաղեցրել է չորրորդ հորիզոնականը: Պրոֆեսիոնալ ժյուրիի անդամները Դավթի երկու ելույթները 110 հնարավորից 104 միավոր են գնահատել:
Դավիթ Վարդանյանը «Մանկական նոր ալիք»-ում զբաղեցրել է չորրորդ հորիզոնականը
«Մանկական նոր ալիք»-ում այս տարի Հայաստանը ներկայացնող 12-ամյա Դավիթ Վարդանյանը հեղինակավոր մրցույթում զբաղեցրել է չորրորդ հորիզոնականը: Պրոֆեսիոնալ ժյուրիի անդամները Դավթի երկու ելույթները 110 հնարավորից 104 միավոր են գնահատել: Ինչպես հաղորդում է «Արցախպրես»-ը, Ղրիմից «Արմենպրես»-ի թղթակցի հետ զրույցում, Դավթի երաժշտական պրոդյուսեր Գրիգոր Կյոկչյանն ընդգծեց, որ կազմակերպիչները որոշիչ չեն համարել «Մանկական նոր ալիք»-ի երկրորդ մրցութային օրվա ընթացքում ծնողների կատարած քվեարկությունը:
«Մրցույթում հաղթող ճանաչվեց Ուկրաինայի ներկայացուցիչ Անդրեյ Բոյկոն, ով շատ լավ հանդես եկավ մրցութային երկու օրերին, և իսկապես լավագույնն էր: Երկրորդ և երրորդ հորիզոնականներում, ի վերջո, երեքական հաղթող եղավ: Իսկ Դավիթը զբաղեցրեց չորրորդ հորիզոնականը: «Հանդիսատեսի համակրանք» մրցանակին էլ արժանացավ Ռուսաստանի ներկայացուցիչ Եկատերինա Մանեշինան»,-նշեց Կյոկչյանը:
Նրա համոզմամբ՝ Դավիթը շատ լավ է հանդես եկել և կատարել է իր առջև դրված խնդիրը: «Հպարտ եմ նրա կատարած աշխատանքով և շատ ուրախ եմ, որ աշխատել եմ նրա հետ: Կարևորում եմ այն հանգամանքը, որ Իգոր Կրուտոյի ակադեմիան պայմանագիր է կնքել Դավթի հետ, և նա այսուհետև մասնակցելու է տարբեր վարպետության դասերի: Սա շատ լուրջ առաջարկ է, որը ոչ բոլորին է տրվում»,-ավելացրեց Գրիգոր Կյոկչյանը:
Կյոկչյանն հավելեց նաև, որ մրցույթի արդյունքում թե՛ ինքը, թե՛ Դավիթը շատ բան են սովորել. այն շատ կարևոր փորձ էր երկուսի համար էլ:
Դավիթ Վարդանյանը դեռևս Հայաստան չի վերադառնա: Նրա ծնողներն «Արմենպրես»-ին տեղեկացրին, որ այս օրերին Դավիթը հանդես կգա Ռուսաստանի Տուապսե քաղաքում՝ տեղի հայկական համայնքի հրավերով: Պատանի երգիչը շարունակելու է զարմացնել և ուրախացնել իր հայրենակիցներին:
«Մանկական նոր ալիք-2014» երաժշտական տոնն անց է կացվել Ղրիմի «Արտեկ» միջազգային մանկական կենտրոնում օգոստոսի 5-19-ը: Բուն մրցույթը տեղի ունեցավ օգոստոսի 16-18-ը: Այս տարի ժյուրիի կազմում հանդես եկան անվանի արտիստներ Ալեսանդրո Սաֆինան, Նյուշան, Լև Լեշչենկոն և Ֆիլիպ Կիրկորովը: Ժյուրին ղեկավարում էր մրցույթի հիմնադիր Իգոր Կրուտոյը:
Միջազգային «Նոր ալիք» մրցույթը կազմակերպվում է ամեն տարի: Առաջին մրցույթը տեղի է ունեցել2002 թվականին Յուրմալայում: Մրցույթի ստեղծման գաղափարը պատկանում է Իգոր Կրուտոյին և Ռայմոնդ Պաուլսին: 2008 թվականից սկսած` ամեն տարի անց է կացվում նաև «Մանկական նոր ալիք»-ը, որի առաջին մրցույթը տեղի է ունեցել Մոսկվայում՝ նոյեմբերի 28-29-ը: