Նախօրեին Ստեփանակերտի մշակույթի և երիտասարդության պալատում կայացել է լիտվացի դրամատուրգ Յուոզաս Գրուշասի «Սեր, ջազ, սատանա» դրամայի հիման վրա բեմադրված տրագիկոմեդիան:
Ստեփանակերտում բեմադրվել է նոր ներկայացում (լուսանկարներ)
ՍՏԵՓԱՆԱԿԵՐՏ, 31 մարտի, ԱՐՑԱԽՊՐԵՍ: «Արցախպրես»-ի թղթակցի հետ զրույցում բեմադրման ռեժիսոր Ստեփանակերտի Վահրամ Փափազյանի անվան պետական դրամատիկական թատրոնի գեղարվեստական ղեկավար Ռուզաննա Խաչատրյանը նշել է, որ ներկայացման դերասանական կազմը Վ. Փափազյանի անվան պետական դրամատիկական թատրոնի երիտասարդ դերասաններն են, բացառությամբ՝ ԼՂՀ վաստակավոր արտիստ Մարտին Ալոյանի:
««Սեր, ջազ, սատանա» ներկայացումը ժամանակակից կյանքն է իր վայրիվերումներով, սերունդների չընդհատվող պայքարով: Այն ոչ միայն արծարծում է ժամանակակից երիտասարդության խնդիրները, այլ այդ խնդիրների առաջացման դրդապատճառները՝ սիրո, ուշադրության, վեհ արժեքների բացակայության պայմաններում առաջացած հոգեբանական անկումները, որի արդյունքում ծնվում է ծանր ու դրամատիկ իրավիճակ»,-ասել է Ռ. Խաչատրյանը և հավելել, որ ինքը ցանկացել է ընդգծել երիտասարդության և ընդհանրապես մարդու կյանքում սիրո մեծ դերը և դրա բացակայությունից ծնվող չարիքները:
Բեմադրման ռեժիսորի խոսքով` մի շարք դժվարություններ կային, կապված տեխնիկական հագեցվածության, ռեժիսորական մտահղացման ու նկարչական ձևավորման իրականացման հետ, որոնք, բնականաբար, թատրոնին հատուկ բեմային պայմանների բացակայությամբ են պայմանավորված:
Ռ. Խաչատրյանի տեղեկացմամբ` ծրագրեր կան ներկայացումը բեմադրելու նաև Երևանում՝ փառատոնների շրջանակում:
Հիշեցնենք, որ ընթացիկ տարվա մարտի 27-ին Թատրոնի համաշխարհային օրվա կապակցությամբ կայացել է ներկայացման առաջնախաղը:
