Ես հույս ունեմ, որ մեր հայ գործընկերները, ընկերները եւ պարզապես մարդիկ ըմբռնումուվ են մոտեցել ԵՏՄ Միջկառավարական խորհրդի նիստը ապրիլին Երեւանից Մոսկվա տեղափոխելուն։
ԵՏՄ Միջկառավարական խորհրդի նիստը ապրիլին Երեւանից Մոսկվա տեղափոխելը նպատակահարմար էր. Վալովայա
ՍՏԵՓԱՆԱԿԵՐՏ, 18 մայիսի, ԱՐՑԱԽՊՐԵՍ: Այս մասին Մոսկվայում հայ լրագրողների հետ հանդիպմանն ասել է ԵՏՀ Կոլեգիայի անդամ, ինտեգրացիայի եւ մակրոտնտեսական քաղաքականության հարցերով նախարար Տատյանա Վալովայա՝ անդրադառնալով հարցին, թե վիրավորական չի համարում արդյոք հայկական կողմի համար Ղազախստանի նախաձեռնությամբ միջոցառումը տեղափոխելը, քանի որ վերջինս կարծում էր, թե դրա անցկացումը կարող էին գնահատել որպես ղարաբաղյան հակամարտության գոտում իրավիճակի սրման ֆոնին Հայաստանին ցուցաբերած աջակցություն, եւ դա այն դեպքում, որ Ադրբեջանը, ի տարբերություն Հայաստանի, ԵՏՄ անդամ չէ, եւ չի կարող որեւէ կապ ունենալ այդ միավորման ներսում տեղի ունեցող գործընթացների հետ։
«Առաջին հերթին Ղազախստանն այս տարի նախագահում է ԵՏՄ-ում, սակայն բոլոր որոշումները, այդ թվում՝ նիստի տեղափոխման որոշումը, ընդունվում են կոնսենսուսով։ Այդ պահին բոլոր մասնակիցները քննարկումներից հետո որոշեցին նիստը Երեւանից Մոսկվա տեղափոխել։ Այս որոշումը կայացվել էր, քանի որ մեր ԵՏՄ-ում ոչ մի քաղաքական չափում չկա»,- ասել է Վալովայան։
Այն դիտարկմանը, թե այդուհանդերձ միջոցառման տեղափոխումը կոնկրետ քաղաքական որոշում էր եւ տնտեսական բաղադրիչ չուներ, Տատյանա Վալովայան պատասխանեց, որ երբեմն պետությունները, որոնք փորձում են լուծում գտնել, «պետք է մարտից վեր գտնվեն, որպեսզի հնարավորություն ունենան օգնել խնդրի լուծման հարցում»։ «Մայիսի 20-ին Երեւանում կկայանա ԵՏՄ միջկառավարական խորհրդի նոր նիստը, եւ ես կարծում եմ, որ այն արդյունավետ կլինի»,- NEWS.am-ի հաղորդմամբ՝ եզրափակել է Վալովայան։
