Այսօր Շուշիում կայացել է պրոֆեսոր Գրիգորի Գաբրիելյանցի անվան ԼՂՀ երկրաբանության պետական թանգարանի բացման արարողությունը,
Շուշիում բացվել է երկրաբանական թանգարան, որտեղ ներկայացված են հազվագյուտ ապարներ
Այսօր Շուշիում կայացել է պրոֆեսոր Գրիգորի Գաբրիելյանցի անվան ԼՂՀ երկրաբանության պետական թանգարանի բացման արարողությունը, որին ներկա էին հայկական երկու հանրապետությունների նախագահներ Բակո Սահակյանն ու Սերժ Սարգսյանը, ԼՂՀ ԱԺ նախագահ Աշոտ Ղուլյանը, ԼՂՀ Մշակույթի և երիտասարդության հարցերի նախարար Նարինե Աղաբալյանը, ՀՀ և ԼՂՀ պետական այրեր և հյուրեր։
«Արցախպրես»-ի հաղորդմամբ` բացման խոսքում Ն. Աղաբալյանը կարևորել է Արցախում երկրաբանության թանգարանի ստեղծումը։ Նախարարը նաև իր երախտագիտությունն է հայտնել ԼՂՀ նախագահի խորհրդական Գ. Գաբրիելյանցին, ով սկիզբ է դրել թանգարանի ստեղծման գործին՝ նվիրաբերելով իր անձնական մեծ հավաքածուն։ Գ. Գաբրիելյանցը շնորհակալություն է հայտնել թանգարանն իր անունով անվանակոչելու համար և հավաստիացրել, որ այսուհետ ևս կանի ամեն ինչ երկրաբանության թանգարանի հետագա ընդլայնման համար։
Միջոցառմանը ներկա Հայաստանի Երկրաբանության գիտությունների ինստիտուտի ակադեմիկոս Ռուբեն Ջրբաշյանը, շնորհավորելով արցախցիներին երկրաբանական թանգարանի բացման կապակցությամբ, նշեց, որ այն մեծ իրադարձություն է ոչ միայն Արցախի, այլև տարածաշրջանի համար։
Ինչպես «Արցախպրես»-ի հետ զրույցում նշեց թանգարանի տնօրեն Յուրի Առաքելյանը, թանգարանում կան հազվագյուտ տիպի ապարներ, իսկ մենահինը 1 մլրդ 200 մլն տարեկան է։ «Արցախից ևս կան նմուշներ, որոնցից ամենահինը 146 մլն տարեկան է։ Բացի այդ, թանգարանում կա 385 նմուշ 48 պետություններից»,- ասաց Յ. Առաքելյանը` հավելելով, որ հետագայում նախատեսում են երեխաների համար հատուկ խմբակ բացել՝ ապագա երկրաբաններ պատրաստելու համար, ինչպես նաև Արցախի տարբեր դպրոցներից աշակերտներ հրավիրել և տեղում նրանց համար երկրաբանական երևույթների վերաբերյալ դասախոսություններ ու դասընթացներ կազմակերպել։
Նշենք նաև, որ Հայաստանից Երկրաբանության գիտությունների ինստիտուտի կողմից Արցախի երկրաբանության թանգարանին են նվիրվել մասնագիտական գրքեր՝ հետագայում երեխաների ուսուցողական ծրագրերում օգտագործելու համար։
