«Եռաբլուր» զինվորական պանթեոնում Հայրենիքի համար նահատակվածների և անհայտ կորածների հիշատակի օրվա կապակցությամբ այսօր տեղի է ունեցած ոգեկոչման արարողությունից հետո պաշտպանության նախարար Սերյան Օհանյանը պատասխանեց լրագրողների հարցերին:
Վստահ եղեք, ՀՀ-ում գոյություն ունեցող ՀՕՊ ուժերն ու միջոցները պլանավորվելու և կիրառվելու են ՀՀ ԶՈւ ղեկավարության կողմից. նախարար
ՍՏԵՓԱՆԱԿԵՐՏ, 29 հունիսի, ԱՐՑԱԽՊՐԵՍ: Tert.am-ի խնդրանքով նա անդրադարձավ հակաօդային պաշտպանության ՀՀ-ՌԴ համաձայնագրին և պատասխանեց հարցին, թե վստահության խնդիր ռուսական կողմի հետ չի՞ տեսնում՝ հաշվի առնելով այն, որ Ռուսաստանը շարունակում է Ադրբեջանին զենք մատակարարել և նույնիսկ ամբողջությամբ չի կատարել Հայաստանի հետ վարկային համաձայնագիրը, նախարարն ասաց, որ ՌԴ-ի հետ ունեցած բոլոր պայմանավորվածությունները՝ տարածաշրջանային համատեղ խմբավորումների ձևավորման, ռազմական և ռազմատեխնիկական համագործակցության շրջանակներում իրականացվում են պատշաճ մակարդակով:
«Մեր ռազմատեխնիկական համագործակցությունը զարգացում է ապրում, չպետք է ոչ ոք մտածի, որ Ռուսաստանի Դաշնությունն է այն պետությունը, որը որ ամենամեծ և ամենաշատ քանակի ներկրումներ է կատարում ՀՀ-ում՝ սպառազինության և ռազմական տեխնիկայի առումով, ընդ որում՝ աջակցում բալանսի պահպանման ուղղությամբ»,-ասաց նա:
Ինչ վերաբերում է միջպետական վարկին, ապա նախարարն ասաց, որ այն իրականացվում է նաև ռազմատեխնիկական համագործակցության զարգացման շրջանակներում, և հնարավորություն է տալիս, որ Հայաստանն առաջին հերթին ժամանակակից սպառազինություն ձեռք բերի ՌԴ-ի և ՀԱՊԿ-ի շրջանակներում ներքին գներով և կապ ունենա տարբեր կազմակերպությունների հետ:
Նա վստահեցրեց, որ միջպետական վարկի իրականացման բոլոր նախապատրաստական աշխատանքները կատարվել են, չպետք է մոռանալ, որ այն կանխիկ գնումներից տարբերվում է, որովհետև համապատասխան ընթացակարգեր ունի, պայմանագրերի 80 տոկոսը կնքվել են արդեն և նախապատրաստական աշխատանքների հիմքում գործընթացը առաջ է գնացել, և մոտ ժամանակներս այդ 20 տոկոսի պայմանագրերը կկնքվեն:
«Հակաօդային պաշտպանության նոր համակարգի ձևավորումը թույլ է տալիս, որ Կովկասյան տարածաշրջանում մեր օդային պաշտպանության խնդիրներում ներառենք ՌԴ 102 բազայի չորրորդ սերնդի բազմաֆունկցիոնալ կործանիչների, օդատիեզերական զորքերի բոլոր հնարավորությունները, որոնք հնարավորություն կտան, որ լուրջ հետախուզական տվյալները ընդհանուր տեղեկատվական դաշտում լինեն և կանխարգելեն բոլոր խախտումները, որ կիրականացվեն, ասենք, մեր հակառակորդների կողմից: Այս առումով առավել քան վստահելի գործընկեր, քան Ռուսաստանն է, այս պահին իր իրականացրած աշխատանքներով, մենք բոլորս չենք տեսնում, և մենք պետք է դրա մեջ վստահություն տեսնենք»,-ասաց նա:
Մեկ այլ լրագրողի հարցին, թե ՆԱՏՕ-ի հետ հարաբերությունները չեն վատանա՞, նա ասաց, որ բազմակողմ հարթության վրա մեր համագործակցությունը իրականացնում ենք: Նա ասաց, որ քանի որ ավելի ամենալավ խաղաղապահները տարածաշրջանում մենք ենք, Պաշտպանության բանակն է, ապա այդ փորձը մենք փոխանակում ենք տարբեր երկրների զինված ուժերի հետ:
«Եվ խաղաղ պայմաններում և պատերազմական ժամանակահատվածում ՀՀ-ում գոյություն ունեցող հակաօդային պաշտպանության ավիացիայի ուժերն ու միջոցները պլանավորվել ու պլանավորվելու և կիրառվելու են ՀՀ ԶՈՒ ղեկավարության և հատկապես ՀՕՊ և Ավիացիայի ղեկավարության կողմից, վստահ եղեք դրանում»,-վստահեցրեց նա:
