Մադրիդում ընթանում է ըմբշամարտի նախաօլիմպիական վերջին մրցաշարերից մեկը՝ «Իսպանիայի Մեծ մրցանակի» խաղարկությունը, որի հունահռոմեական ոճի ըմբշամարտի մրցումներում 8 քաշային կարգերում ստուգատեսի մրցանակներ են վիճարկում 22 երկրի 77 ուժեղագույն ըմբիշներ:
Հայազգի 2 ըմբիշներ փայլուն մրցելույթներ ունեցան Իսպանիայի մրցաշարում
ՍՏԵՓԱՆԱԿԵՐՏ, 11 հուլիսի, ԱՐՑԱԽՊՐԵՍ: Ինչպես տեղեկացնում է wrestling.am-ը, վերջիններիս թվում էին նաև հայազգի 2 ըմբիշներ, որոնց հաջողվեց մրցաշարի մրցանակակիրներ դառնալ: Նրանք են՝ վերջին 2 տարիների մեծահասակների ՌԴ-ի փոխչեմպիոն, 2012-2013 թ. ՌԴ առաջնությունների բրոնզե մեդալակիր, 2015 թ. Բաքվի Եվրոպայի մարզական 1-ին խաղերի չեմպիոն, երիտասարդների 2010 թ. աշխարհի և 2007-2008 թթ. Եվրոպայի չեմպիոն, միջազգային բազմաթիվ մրցաշարերի հաղթող և մրցանակակիր, 24-ամյա կրասնոդարցի, 59 կգ քաշային Ստեփան Մարյանյանն ու Ֆրանսիան ներկայացնող 66 կգ քաշային Հրաչիկ Մալխասյանը: Հայազգի այս երկու ըմբիշներն էլ վստահ անցկացրին մրցումներն ու հասան եզրափակիչ:
Մարյանյանը 59 կգ քաշային կարգի 9 ըմբիշների պայքարում նախ քառորդ եզրափակչում 4:2 հաշվով առավելության հասավ ՌԴ-ի օլիմպիական հավաքականում ընդգրկվելու իր գլխավոր մրցակիցներից մեկի՝ Մինգիյան Սեմյոնովի նկատմամբ: Հետագայում կիսաեզրափակչում և եզրափակչում հայ ըմբիշին չկարողացան դիմակայել նաև ղազախ Ժանսերիկ Սարսենբիևը, ապա նաև էկվադորցի Անդրեաս Մոնտանոն, որոնց նա պարտության մատեց 7:0 և 7:1 հաշիվներով ու դարձավ ստուգատեսի հաղթող:
Հունահռոմեական ոճի ըմբշամարտի ՌԴ-ի ազգային հավաքականի գլխավոր մարզիչ Գոգի Կոգուաշվիլին մրցումային 1-ին օրվա մրցելույթների արդյունքներն ամփոփելու ժամանակ հայտարարել է, որ Մարյանյանի մադրիդյան այս հաղթանակը շատ կարևոր էր, և լուրջ ու ծանրակշիռ հայտ է 59 կգ քաշային կարգում` «Ռիո-2016»-ում Ռուսաստանը ներկայացնելու համար: Մարյանյանն ընթացիկ մրցաշրջանում իր ցուցադրած արդյունքներով և ունեցած փայլուն մարզավիճակով այս պահին Ռուսաստանի օլիմպիական հավաքականում ընդգրկվելուն ամենամոտը կանգնած ֆավորիտներից է: Բայց մարզչի խոսքով՝ վերջնական որոշում կկայացնեն ու վերջնական կազմերը կհայտարարեն Ադլերում տեղի ունենալիք ուսոումնամարզական հավաքի ընթացքում` այնտեղ կազմակերպվելիք փորձամրցումային գոտեմարտերից հետո:
Մադրիդում 66 կգ քաշային կարգի 13 ըմբիշների պայքարում իրեն լավագույն կողմերով դրսևորեց նաև Հրաչիկ Մալխասյանը: Ֆրանսիայի պատվիրակ մեր հայրենակիցը 1/8-րդ փուլում 8:0 հաշվով հաղթեց իր համերկրացի Ստեֆան Կլիմենտին: Քառորդ եզրափակչում նա 6:2 հաշվով առավելության հասավ շվեյցարացի Անդրեաս Վետցի նկատմամբ: Կիսաեզրափակչում Հրաչիկը 5:0 հաշվով պարտության մատնեց նաև ղազախ ըմբիշ Նուրգալիմ Կուանդիկին և միայն եզրափակչում հավասար պայքարում զիջեց Կուբայի պատվիրակ Միգել Մարտինեսին: