Սեպտեմբերի 28-ին Երևանում տեղի է ունենալու «Գութան» ազգագրական երգի-պարի փառատոն, որին արդեն երրորդ տարին է, ինչ Արցախի «Մենք ենք մեր սարերը» ազգագրական երգի-պարի պետական համույթը մասնակցում է:
Արցախի «Մենք ենք մեր սարերը» ազգագրական երգի-պարի պետական համույթը մասնակցելու է «Գութան» փառատոնին
ՍՏԵՓԱՆԱԿԵՐՏ, 21 սեպտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում տեղեկացրել է «Մենք ենք մեր սարերը» ազգագրական երգի-պարի պետական համույթի գեղարվեստական ղեկավար` արվեստի վաստակավոր գործիչ Գարի Ավանեսյանը` նշելով, որ հոկտեմբերի 3-ին առաջին անգամ փառատոնը տեղի է ունենալու նաև Ստեփանակերտում:
Գ. Ավանեսյանի խոսքով` Արցախի «Մենք ենք մեր սարերը» ազգագրական երգի-պարի պետական համույթն անցած տարվա գարնանը հյուրախաղերով հանդես է եկել Ռուսաստանի Դաշնության Ռոստովի մարզի 5 քաղաքներում:
Գեղարվեստական ղեկավարի տեղեկացմամբ` համույթն այս տարի հյուրախաղերի հրավերներ է ստացել Իրանի Հանրապետությունից, Ռուսաստանի Դաշնությունից, Լիբանանից, ՀՀ Լոռու մարզից: Ի դեպ, խումբը համերգային ծրագրերով ողջ տարվա ընթացքում շարունակելու է հանդես գալ ԼՂՀ-ի շրջաներում և ՊԲ զորամասերում:
«Համույթի ստեղծագործական կազմում ընդգրկված են 29 հոգի. նրանք երգիչ-երգչուհիներն են, երաժիշտ կատարողներն ու պարողները։ Համույթն ունի մշակված ծրագիր, որում ընդգրկված են հայկական ազգագրական, հայրենասիրական ու ֆիդայական երգեր ու պարեր: Համույթի նպատակն է, որ ԼՂՀ-ում ազգային մշակույթը պահպանվի` փրկվի մոռացումից. չէ՞ որ բոլոր մշակույթների հիմքը ազգագրականն է, և մենք պետք է ոչ միայն սիրենք , այլև կյանքի կոչենք ու տարածենք հայկական ազգային երգն ու պարը: Եվ թող որ այդ երգերը մեզ նոր ուժ ու նոր լիցքեր տան, որ կարողանանք նրանցով կերտել նորանոր հաղթանակներ»,-խոսքն ընդանրացրել է համույթի գեղարվեստական ղեկավարը:
Նշենք նաև, որ «Մենք ենք մեր սարերը» ազգագրական երգի-պարի պետական համույթն Արցախում մեկնարկել է 2000 թվականից: