Թուրքիայի խորհրդարանի շենքի պատերից Աթաթուրքի պատկերով ևս մի գեղանկար է պակասել:
Թուրքիայի խորհրդարանի շենքի պատերից անհետացել է Աթաթուրքի ևս մի նկար
ՍՏԵՓԱՆԱԿԵՐՏ, հոկտեմբերի 28, ԱՐՑԱԽՊՐԵՍ: Այս մասին գրում է թուրքական «Սյոզջու» պարբերականը, հայտնում է Թերթ.ամ-ը:
Գեղանկարը, որում պատկերված է Մուստաֆա Քեմալ Աթաթուրքը՝ ճաշի սեղանի շուրջ , իսկ սեղանին դրված է նաև ռաքը խմիչքի շիշ (ոգելից խմիչք, որը տարածված է նաև Մերձավոր Արևելքում, Բալկանյան երկրներում), կախված է եղել խորհրդարանի ճաշարանում: Նկարի հեղինակն է հայտնի գեղանկարիչ Յաշար Չալլըն:
Նշվում է, որ նկարը հանվել է վերանորոգման պատրվակով, սակայն այդպես էլ հետ չի բերվել: Ավելին՝ գեղանկարի փոխարեն հեռուստացույց է կախվել:
Սա Աթաթուրքին պատկերող արդեն երկրորդ գեղանկարն է, որն անհետանում է խորհրդարանի սրահների պատերից: Հարցի վերաբերյալ իր դժգոհությունն է հայտնել նաև նկարիչը, որը մինչև 2002թ. համարվել է խորհրդարանի պաշտոնական գեղանկարիչը:
Ժողովրդահանրապետական կուսակցության անդամ, Մերսինից ընտրված պատգամավոր Ֆիքրի Սաղլարը, մեկնաբանելով ստեղծված իրավիճակը, նշել է, որ Էրդողանի «Արդարություն և զարգացում» կուսակցության անդամները դիտավորյալ են կազմակերպում այդ ամենը:
«Աթաթուրքի մահից անցել է գրեթե 80 տարի, սակայն մեծ առաջնորդն ու նրա կատարած հեղափոխությունները դեռևս ստիպում են դողալ ԱԶԿ-ականներին», - հայտարարել է ընդդիմադիր պատգամավորը:
Թուրք տարբեր սյունակագիրներ մեկ անգամ չէ, որ խոսել են նախագահ Ռեջեփ Թայիփ Էրդողանի՝ Աթաթուրքին գերազանցելու ցանկության, անգամ՝ Աթաթուրքի հանդեպ տածած գաղտնի ատելության մասին:
Հիշեցնենք, որ Լոզանի պայմանագրի վերաբերյալ Էրդողանի աղմկահարույց ելույթը, որի ընթացքում նա Լոզանն անվանել էր Թուրքիայի կորուստն ու քննադատել պայմանագիրը ստորագրող թուրք դիվանագետներին՝ այդ թվում և Աթաթուրքին, խիստ հակազդեցության էր արժանացել Աթաթուրքի կողմից հիմնադրված և ներկայում ընդդիմադիր համարվող Ժողովրդահանրապետական կուսակցության անդամների կողմից: