Ամերիկյան The Washington Post պարբերականն անդրադարձել է վերջին շրջանում Թուրքիայում ԶԼՄ-ների նկատմամբ ճնշումների սաստկացմանն ու քննադատել երկրի իշխանություններին:
Մի անձի պաշտամունքը հարվածում է Թուրքիայի` ժողովրդավարության երազանքին. The Washington Post
ՍՏԵՓԱՆԱԿԵՐՏ, 2 նոյեմբերի, ԱՐՑԱԽՊՐԵՍ։ Թերթը, մասնավորապես, նշում է, որ «մի անձի պաշտամունքը հարվածում է Թուրքիայի` ժողովրդավարության երազանքին»:
Ըստ The Washington Post-ի` դեռևս 10 տարի առաջ Թուրքիան ուներ ակտիվ հասարակություն, որոշակիորեն ազատ մամուլ և զարգացման փուլում գտնվող ժողովրդավարություն:
«Սակայն այլևս այդպես չէ: Նախագահ Ռեջեփ Թայիփ Էրդողանը լքել է ժողովրդավարությանը և կառուցում է մեկ անձի պաշտամունքի հզոր մշակույթ», - գրում է պարբերականը:
The Washington Post-ը նաև շեշտել է, որ օրերս «Ջումհուրիյեթ» թերթի խմբագրակազմի դեմ իրականացված ոստիկանական գործողությունները չի կարելի կապել հուլիսի 15-ի հեղաշրջման փորձից հետո հեղաշրջման կազմակերպման համար մեղադրվող թուրք կրոնական քարոզիչ ֆեթուլլահ Գյուլենի թիմակիցների դեմ ձեռնարկված միջոցառումների հետ, քանի որ «Ջումհուրիյեթ»-ը տարիներ շարունակ քննադատել է հենց Գյուլենին և նրա շարժումը:
«Էրդողանին քննադատել շարունակող եզակի թերթերից մեկը, որ մնացել էր, «Ջումհուրիյեթ»-ն էր: Էրդողանը պարզապես ցանկանում է դաշտում թողնել միայն իր ասածները շարունակաբար կրկնող ԶԼՄ-ների»,- գրված է հոդվածում:
Հիշեցնենք, որ օրեր առաջ Թուրքիայի ոստիկանությունն Անկարայում հատուկ գործողություն է իրականացրել ընդդիմադիր «Ջումհուրիյեթ» թերթի աշխատակիցների դեմ: Խուզարկություններ են իրականացվել թերթի տնօրենի, խմբագիրների և մի շարք սյունակագիրների տներում: Ձերբակալված է նաև թերթի գլխավոր խմբագիր Մուրադ Սաբունջուն:
