Նոյեմբերի 17-ին՝ փիլիսոփայության համաշխարհային օրը, Երևանի Պետական համալսարանի փիլիսոփայության և հոգեբանության ֆակուլտետում մեկնարկած «Արիստոտելի ժառանգությունը հայոց մշակույթի համատեքստում (արիստոտելյան ընթերցումներ)» խորագրով քառօրյա գիտաժողովը նոյեմբերի 19-ին իր աշխատանքներն է շարունակել Արցախում՝ Մատենադարան-Գանձասար գիտամշակութային կենտրոնում:
Գանձասարը վերականգնում է հոգևոր-կրթական կենտրոնի համբավը. կայացել է առաջին գիտաժողովը (լուսանկարներ)
ՍՏԵՓԱՆԱԿԵՐՏ, 20 նոյեմբերի, ԱՐՑԱԽՊՐԵՍ:«Արցախպրես»-ի թղթակցի հաղորդմամբ` երկու հայկական հանրապետությունների անկախության հռչակման 25-րդ տարեդարձներին նվիրված գիտաժողովին ողջույնի խոսքով հանդես է եկել ԼՂՀ կրթության, գիտության և սպորտի փոխնախարար Արմեն Սարգսյանը:
«Գիտաժողովի անցկացումն Արցախի Մատենադարան-Գանձասար գիտամշակութային կենտրոնում խորհրդանշական է, քանի որ Գանձասարը հարյուրամյակներ շարունակ ոչ միայն եղել է հայկական նշանավոր հոգևոր կենտրոն, այլև մեծ դերակատարություն է ունեցել՝ գրչության, գիտության և մշակույթի զարգացման համար: Կենտրոնը խոշոր երևույթ է եղել Արցախի մշակութային և գիտական կյանքում, և ողջունելի է, որ անկախության հռչակումից հետո այն կրկին վերականգնում է հին ավանդույթները»,- ասել է փոխնախարարը:
Գիտաժողովի կազմկոմիտեի նախագահ, ԵՊՀ փիլիսոփայության և հոգեբանության ֆակուլտետի դեկան Ալեքսան Բաղդասարյանը, իր հերթին կարևորելով գիտաժողովի կազմակերպումը և, հատկապես, նրա անցկացումն Արցախում, նշել է, որ վաղ միջնադարից մինչև մեր օրերն Արիստոտելի փիլիսոփայությունը հայ մտքի համար առանցքային կարևորություն է ունեցել:
«Ընդառաջ գնալով ՄԱԿ-ի կրթության, գիտության և մշակույթի կազմակերպության կողմից ընթացիկ տարին «Արիստոտելի հոբելյանական տարի» հռչակելու հանգամանքին և արժևորելով Արիստոտելի ժառանգությունը՝ կազմակերպեցինք այս կարևոր գիտաժողովը: Նպատակը ոչ միայն երկու հայկական հանրապետություններում մտավոր կապերի ամրապնդումն է, այլև վերջին տարիների ընթացքում մեր ձեռք բերած գիտական նորություններին մեր արցախյան շրջանականերին հաղորդակից դարձնելն է: Կարծում եմ՝ առաջիկա տարիներին այստեղ կստեղծվի նաև գիտական լուրջ օջախ, ինչի համար առկա են բոլոր կարևոր նախադրյալները և այդ առումով հատկանշական է երիտասարդների ակտիվ մասնակցությունն այս գործընթացին»,-ասել է Ա. Բաղդասարյանը:
Գիտաժողովի բացմանը Ա. Բաղդասարյանը ընթերցել է նաև ԵՊՀ ռեկտոր Արամ Սիմոնյանի շնորհավորական ուղերձը՝ ուղղված գիտաժողովի մասնակիցներին:
Գիտաժողովին զեկույցներով հանդես են եկել ՀՀ Գիտությունների ազգային ակադեմիայի (ԳԱԱ) փիլիսոփայության, սոցոլոգիայի, իրավունքի ինստիտուտի առաջնակարգ գիտաշխատող, պրոֆեսոր Կառլեն Միրումյանը, ՀՀ ԳԱԱ-ի թղթակից անդամ, փ.գ.դ., պրոֆեսոր Ալեքսանդր Մանասյանը, ԵՊՀ փ.գ.թ., դոցենտ Սիլվա Պետրոսյանը և Մատենադարանի կառավարման խորհրդի անդամ, ՀՀ գրողների միության անդամ, դոկտոր, պրոֆեսոր Հրաչյա Միրզոյանը:
Վերջինս ելույթից հետո Մատենադարան-Գանձասար գիտամշակութային կենտրոնի գործունեության պատասխանատու Արամ Թորոսյանին է հանձնել 1981 թվականին Ծալկայում Արիստոտելի մահվան 2300-ամյակին նվիրված ընթերցումների ժամանակ ստացած հուշամեդալը` Արիստոտելի դիմապատկերով:
Զեկույցներից հետո Արցախի պետական համալսարանի դասախոսներն և ուսանողները հանդես են եկել հարցադրումներով ու մեկնաբանություններով:
Միջոցառման ավարտին ԱրՊՀ ուսանողների հետ տարվող աշխատանքների գծով պրոռեկտոր Վիտյա Յարամիշյանը համալսարանի պրոֆեսորադասախոսական կազմի և ուսանողների անունից շնորհակալություն է հայտնել գիտաժողովի կազմակերպիչներին՝ հետաքրքիր, բովանդակալից ու անմիջական մթնոլորտում այն անցկացնելու համար:
Ներկաները ծանոթացել են նաև Մատենադարան-Գանձասար գիտամշակութային կենտրոնի ցուցասրահներում ներկայացված վաղ միջնադարից մինչև նոր շրջանն Արցախում ստեղծված 100-ից ավելի ձեռագրերի և Արցախի պատմությանն առնչվող հազվագյուտ վավերագրերի բնագրերի և ընդօրինակությունների, ինչպես նաև հնատիպ գրքերի և արխիվային փաստաթղթերի:
Մատենադարան-Գանձասար գիտամշակութային կենտրոնի գործունեության պատասխանատու Արամ Թորոսյանն «Արցախպրես»-ի թղթակցի հետ զրույցում նշել է, որ մեկամյա գործունեության ընթացքում կենտրոնում առաջին անգամ անցկացվող գիտաժողովը խորհրդանշում է հայ ժողովրդի միասնականութ-յունը՝ հոգևոր, գիտական և մշակութային առումներով:
«Նմանօրինակ գիտաժողովները լայն համագործակցության շրջանակներում կրելու են շարունակական բնույթ»,- ասել է Ա. Թորոսյանը:
Մատենադարան-Գանձասար գիտամշակութային կենտրոնի պատասխանատուն նշել է նաև, որ մեկ տարվա ընթացքում կենտրոնն ունեցել է տեղացի և օտարերկրյա շուրջ 12 հազար այցելու:
Ա. Թորոսյանի խոսքով, սերտ համագործակցություն կա նաև Պաշտպանության բանակի հետ, և այս ընթացքում արդեն շուրջ 4000 նորակոչիկներ են այցելել Մատենադարան-Գանձասար գիտամշակութային կենտրոն:
Նշենք, որ գիտաժողովը մեկնարկել է փիլիսոփայության համաշխարհային օրը՝ նոյեմբերի 17-ին և կավարտվի այսօր՝ նոյեմբերի 20-ին:
Տեղեկացնենք, որ նոյեմբորի 19-ին գիտաժողովի մասնակիցներին ընդունել է Արցախի Հանրապետության վարչապետ Արայիկ Հարությունյանը:
Ի դեպ, գիտաժողովի արցախյան օրերն անցկացվել են ԼՂՀ վարչապետի բարձր հովանու ներքո:
