Ադրբեջանի նախագահ Իլհամ Ալիևը բավականին տարօրինակ հրամանագիր է ստորագրել «Ադրբեջանի ու Հայաստանի զորքերի շփման գծում անվտանգության ամրապնդմանն ուղղված որոշ քայլերի մասին», հաղորդվում է նրա պաշտոնական կայքում:
Ալիևի տարօրինակ հրամանագիրը` «Հարավային Կովկասի ուժեղագույն բանակը» սահմանամերձ գոտու բնակիչներից կամավորական ջոկատների կարիք է զգում
Ադրբեջանի նախագահ Իլհամ Ալիևը բավականին տարօրինակ հրամանագիր է ստորագրել «Ադրբեջանի ու Հայաստանի զորքերի շփման գծում անվտանգության ամրապնդմանն ուղղված որոշ քայլերի մասին», հաղորդվում է նրա պաշտոնական կայքում:
Համաձայն հրամանի` Հայաստանի ու Ադրբեջանի զինված ուժերի շփման գծի հարող տարածքներում անվտանգության միջոցառումների ուժեղացման, զանգվածային լրատվամիջոցներում ու համացանցային ռեսուրսներում, ինչպես նաև սոցկայքերում պաշտպանական տեսանկյունից առանձնակի նշանակություն ունեցող օբյեկտների տեղակայման ու նշանակության մասին տեղեկությունների տարածումը կանխելու, բնակչության զգոնությունը բարձրացնելու համար հանձնարարվում է անհրաժեշտ քայլեր ձեռնարկել տեղի բնակչության շարքերում կամավորներից բաղկացած պարեկային ջոկատներ ստեղծելու համար:
REX տեղեկատվական գործակալությունը գրում է, որ նախ անհասկանալի է, թե ինչ տրամաբանությունից ելնելով է Իլհամ Ալիևը խոսակցություն վարում միայն «Ադրբեջանի ու Հայաստանի զինված ուժերի շփման գծին հարող տարածքների մասին»:
«Սա արդեն հարցեր է առաջացնում: Իրականությունն այնպիսին է, որ ՀՀ ու Ադրբեջանի զինված ուժերի միջև սահմանի հիմնական հատվածն անցնում է Ադրբեջանի ու Լեռնային Ղարաբաղի սահմանով: Ստացվում է, որ Ադրբեջանի նախագահը անուղղակի կերպով Լեռնային Ղարաբաղը ճանաչում է որպես ՀՀ մի մա՞ս»,- հարցադրում է թալիշ գիտնական, քաղաքագետ եւ հասարակական գործիչ Ֆահրադին Աբոսզոդան` նշելով, որ առանձնակի ինտրիգ է հարուցում նման մոտեցումը հենց հիմա, երբ առաջին հերթին ԵԱՀԿ Մինսկի խմբի ամերիկացի, իսկ դրանից հետո նաև ֆրանսիացի համանախագահը միաձայն հայտարարում են Ստեփանակերտը ԼՂ հակամարտության կարգավորման շուրջ բանակցությունների մեջ ներգրավելու մասին:
«Եթե ելնենք այս ամենից` պարզ է դառնում, որ Ադրբեջանի նախագահը նախօրոք հող է նախապատրաստում, որպեսզի սա թույլ չտա: Չնայած հասկանալի է, որ ամեն ինչ չէ, որ այս հարցում կախված է Իլհամ Ալիևի դիրքորոշումից: Սակայն սա դեռևս գլխավորը չէ: Ըստ էության` Իլհամ Ալիևը այս հակամարտության պատմության մեջ է ներքաշում նոր տարր՝ ի դեմս «տեղի խաղաղ բնակչության շարքերից կամավորական պարեկային ջոկատների»` «բնակչության զգոնությունը բարձրացնելու համար», ինչը ևս Ադրբեջանի իշխանությունների քաղաքականության համար նորույթ է հանդիսանում: Պարզվում է, որ «Հարավային Կովկասի ամենաուժեղ բանակը», ինչի մասին Ալիևը մշտապես բարձրաձայնում է ողջ աշխարհի առջև, հանկարծ «կամավորական ջոկատների» կարիք է զգում: Տարօրինակ է, այնպես չէ՞: Չի՞ հանդիսանում արդյոք սա անուղղակի ապացույց այն բանի, որ Ադրբեջանի նախագահը չի վստահում իր երկրի բանակին»,- շարունակում է քաղաքագետը:
«Սակայն նույնիսկ սա չէ ամենակարևորն այդ հրամանագրում: Գլխավորն այն է, թե ինչու Ադրբեջանը հենց հիմա, երբ հակամարտությունն արդեն շարունակվում է այսքան տարի, սկսեց զբաղվել «հարող տարածքներում անվտանգության միջոցառումների ամրապնդմամբ»,- շեշտադրում է Ֆահրադին Աբոսզոդան:
Ադրբեջանի նախագահը երկրի կառավարությանը հրահանգել է եռամսյա ժամկետում «Ռազմական դրության մասին» նոր օրենք մշակել` 1994 թվականից գործող օրենքի փոխարեն, իսկ մեկ ամսում ներկայացնել միջոցառումների ցանկը, որոնց իրագործման դեպքում հնարավոր կլինի խստացնել այն անձանց պատիժը, ովքեր ռազմական ոլորտում պետական գաղտնիք պարունակող տեղեկություններ կհրապարակեն:
Ավելին, Ադրբեջանի նախագահի աշխատակազմը պետք է «սահմանամերձ գոտում բնակվող բնակիչների հետ բացատրական աշխատանքներ տանի ռազմական ոլորտում Ադրբեջանի ազգային անվտանգությանը հնարավոր վնաս հասցնող ռազմական տեղեկությունների տարածման անթույլատրելիության շուրջ:
Ադրբեջանի Մամուլի խորհուրդը ևս անգործության չի մատնվում: Այն պետք է քարոզչական տեղեկատվական աշխատանք կատարի լրատվամիջոցների ու բնակչության հետ` Ադրբեջանի անվտանգությանը ռազմական ոլորտում վնաս հասցնող տեղեկությունների տարածման կանխման համար:
«Գլխավոր ինտրիգը հրամանագրի հենց այն հատվածում է, որտեղ խոսքը գնում է լրագրողների ու տեղեկատվական ռեսուրսների աշխատանքի մասին: Սույն հրամանագրի պատճառները պետք է փնտրել վերջերս Նախիջևանի շրջանում գրանցված միջադեպում, երբ համաձայն լրատվամիջոցներում հայտնված տեղեկությունների` այդ շրջանի բնակիչները հայտնել էին, որ ադրբեջանական կողմը, այսպես կոչված, «չեզոք» տարածքից մի քանի հարյուր քմ տարածքներ զիջել էր հայկական զորքերին»:
Հենց նմանատիպ տեղեկությունների ԶԼՄ-ներում հայտնվելը կանխելու համար երեկ ստորագրած հրամանագրով Իլհամ Ալիևը կարգադրել է Ադրբեջանի Պաշտպանության նախարարությանը շփման գծում աշխատող լրագրողների հավատարմագրման նոր կարգ սահմանել:
