Արցախի պետական համալսարանի տնտեսագիտության ֆակուլտետի հրավերով ԱՀ ֆինանսների նախարարի տեղակալ Արթուր Հարությունյանը հանդիպել է ֆակուլտետի ուսանողների և պրոֆեսորադասախոսական կազմի հետ:
ԱՀ ֆինանսների փոխնախարարը հանդիպել է ԱրՊՀ տնտեսագիտության ֆակուլտետի ուսանողների հետ
ՍՏԵՓԱՆԱԿԵՐՏ, դեկտեմբերի 2, ԱՐՑԱԽՊՐԵՍ: Ինչպես «Արցախպրես»-ին հայտնեցին ԼՂՀ ֆինանսնաերի նախարարությունից, հանդիպման նպատակն էր ներկայացնել հարկային համակարգում իրականացվող բարեփոխումները:
Նախարարի տեղակալի և նախարարության հարկային վարչարարության մեթոդաբանության և հարկ վճարողների իրազեկման բաժնի պետի կողմից ներկայացվել են հարկային օրենսդրության և վարչարարության բարելավմանն ուղղված բարեփոխումները, մասնավորապես, տարբեր ոլորտների համար սահմանված արտոնությունները, հսկողության իրականացման հիմնական մեխանիզմները, հարկ վճարողներին մատուցվող ծառայությունների որակի բարձրացմանն ու հարկատու-հարկային մարմին փոխհարաբերությունների ամրապնդմանը, օրինապահ և կիրթ հարկ վճարողի ինստիտուտի կայացմանն ուղղված քայլերը, էլեկտրոնային կառավարման համակարգի արդիականացման և մի շարք այլ ուղղություններով իրականացված միջոցառումները:
Անդրադառնալով հարկերի հավաքագրման գործընթացին` Հարությունյանը նշել է, որ ներկայումս հարկային մարմնի գերնպատակն է հարկ վճարողների մոտ ձևավորել հարկերի ճիշտ և ժամանակին վճարման մշակույթ: Այս գործընթացում չափազանց կարևոր է հասարակության դերը: Հասարակության յուրաքանչյուր անդամի կողմից հարկերի վճարումը պետք է ընկալվի ոչ թե որպես լրացուցիչ բեռ, այլ որպես իրեն, իր ընտանիքին և մերձավորներին անհրաժեշտ` պետության կողմից մատուցվող ծառայությունների համար կատարվող վճարներ: «Այս գաղափարի պահպանմամբ միայն կունենանք հարկատու-հարկային մարմին առողջ, գործընկերային հարաբերություններ, ինչն էլ իր հերթին կնպաստի բյուջեի եկամուտների հավաքագրման աճին», - հավելել է նախարարի տեղակալը:
Հանդիպման ընթացքում Ա. Հարությունյանը պատասխանել է նաև ուսանողներին հուզող հարցերին:
Հանդիպմանը երկուստեք պայմանավորվածություն ձեռք բերվել հետագա համագործակցության մասին: