«Արցախպրես»-ի հաղորդմամբ՝ այսօր Ստեփանակերտի Մարտունի փողոցում տեղի է ունեցել նշանավոր խորհրդային պետական-քաղաքական գործիչ Ալեքսանդր Մյասնիկյանի (Մարտունի) հուշարձանի բացման հանդիսավոր արարողությունը։
Ալեքսանդր Մյասնիկյանի (Մարտունի) հուշարձանը կանգնեցվել է Ստեփանակերտի իր անունը կրող փողոցում
Այսօր Ստեփանակերտի Մարտունի փողոցում տեղի է ունեցել խորհրդային նշանավոր պետական-քաղաքական գործիչ Ալեքսանդր Մյասնիկյանի (Մարտունի) հուշարձանի բացման հանդիսավոր արարողությունը։
«Արցախպրես»-ի հաղորդմամբ՝ միջոցառմանը ներկա էին ԼՂՀ նախագահ Բակո Սահակյանը, վարչապետ Արա Հարությունյանը, Հայ Առաքելական Եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, ԱԺ պատգամավորներ, կառավարության անդամներ, ինչպես նաև տոնի կապակցությամբ Արցախ ժամանած Երևանի քաղաքապետ Տարոն Մարգարյանի գլխավորած պատվիրակության անդամները։
«Այսօր հիշարժան օր է մի քանի առումներով,- միջոցառման բացմանն ասաց Ստեփանակերտի քաղաքապետ Սուրեն Գրիգորյանը։ -Այսօր մենք նշում ենք, մեր հարազատ ու հիասքանչ մայրաքաղաքի՝ Ստեփանակերտի օրը։ Այս օրը մեր քաղաքի պատմության մեջ կմտնի ևս մեկ կարևոր իրադարձությամբ՝ Խորհրդային Միության ականավոր կուսակցական, պետական ու ռազմական գործիչ, մտավորական ու գրականագետ Ալեքսանդր Մյասնիկյանի (գրական կեղծանունը՝ Մարտունի) հուշարձանի բացման հանդիսավոր արարողությամբ, այն անհատականության, ում անունն է կրում նաև այս գողտրիկ փողոցը»։
Հուշարձանի բացման պատիվը տրվեց քաղաքապետ Սուրեն Գրիգորյանին և Արցախի կոմունիստական կուսակցության նախագահ Հրանտ Մելքումյանին։
Միջոցառմանը շնորհավորանքի խոսքով հանդես եկան Հրանտ Մելքումյանը և հուշարձանի հեղինակ՝ անվանի քանդակագործ Յուրի Հովհաննիսյանը։ Փողոցի բնակիչների անունից հուշարձանի համար խորին շնորհակալություն հայտնեց Մարտունի փողոցի հին բնակիչ Վարդան Աբրահամյանը։
