իրիական ճգնաժամի վերաբերյալ Ռուսաստանի, Թուրքիայի և Իրանի Իսլամական Հանրապետության արտգործնախարարների միջև Մոսկվայում տեղի ունեցած պատմական հանդիպումը 6 տարի շարունակ Ասադի իշխանության դեմ հանդես եկող Թուրքիայի համար մեծագույն անկում էր
Սիրիական ճգնաժամի շուրջ Մոսկվայում տեղի ունեցած հանդիպումն ու ստորագրված հայտարարագիրը Թուրքիայի պարտությունն է. «Ջումհուրիյեթ»
ՍՏԵՓԱՆԱԿԵՐՏ, դեկտեմբերի 23, ԱՐՑԱԽՊՐԵՍ: Այս մասին գրում է թուրքական «Ջումհուրիյեթ» պարբերականը, փոխանցում է ԹԵՐԹ.ամ-ը:
Մոսկվայում տեղի ունեցած պատմական հանդիպման ժամանակ կողմերն ընդհանուր հայտարարագիր են ստորագրել, որով պարտավորվում են հարգել Սիրիայի արաբական հանրապետության տարածքային ամբողջականությունը, կարևորություն են տալիս Սիրիայում մարդասիրական օգնության անխոչընդոտ հասցման և խաղաղ բնակիչների ազատ ու ապահով տեղաշարժին նպաստող պայմանների ստեղծմանը, ինչպես նաև դրական գնահատում Հալեպի արևելյան շրջաններից ընդդիմադիր գրոհայինների և Հալեպից դուրս գալ ցանկացող խաղաղ բնակիչների տարհանման կազմակերպումն ու պատրաստակամություն հայտնում Ասադի իշխանության և ընդդիմադիրների միջև բանակցություններ սկսվելու դեպքում հանդես գալ որպես երաշխավոր ուժեր:
Հիշեցնելով Թուրքիայի նախագահ Ռեջեփ Թայիփ Էրդողանի կողմից Ասադի իշխանությունը տապալելու նպատակ ունենալու մասին աղմկահարույց հայտարարությունները, պարբերականը նշում է, որ Մոսկվայում տեղի ունեցած հանդիպումը շրջադարձային է և Թուրքիան փաստացի այլևս ստիպված է եղել ետ կանգնել Սիրիայի հետ կապված իր վաղեմի երազանքներից:
Ինչպես իրավացիորեն նշում է ընդդիմադիր պարբերականը՝ այն, որ Թուրքիան ստիպված է եղել ստորագրել այս հայտարարագրի տակ, խոսում է այն մասին, որ Թուրքիան փաստացի տանուլ է տվել Սիրիայի շուրջ խաղում:
Հիշեցնենք, որ «Ջումհուրիյեթ» թերթի խմբագրակազմի դեմ իրականացված ոստիկանական գործողության ընթացքում ձերբակալված և ավելի ուշ ազատ արձակված հայտնի թուրք լրագրող, հրապարակախոս Այդըն Էնգինն իր վերջին հոդվածում հայտարարել է, որ Էրդողանը Սիրիայի հարցում «լիզել է իր թքածն» ու հավելել՝ «Շատ էլ լավ է եղել» :
Թուրքիայի նախագահը շաբաթներ առաջ հայտարարել էր, որ թուրքական ԶՈւ-ն Սիրիայի հյուսիս է մտել Ասադի իշխանությունը տապալելու համար:
Ավելի ուշ Էրդողանն իր հայտարարության առնչությամբ հետքայլ է արել՝ Ռուսաստանի նախագահ Վլադիմիր Պուտինի հետ հեռախոսազրույցից անմիջապես հետո:
Թուրքական հատուկ նշանակության ուժերն օգոստոսի 24-ի առավոտյան մտել են Սիրիայի տարածք՝ իրենց իսկ խոսքով՝ «Իսլամական պետություն» խմբավորման գրոհայիններից հյուսիսային Ջերաբլուս քաղաքի ազատագրման գործողության շրջանակում: Թուրքական ԶՈւ-ին աջակցում են նաև «Սիրիական ազատ բանակ» ընդդիմադիր խմբավորումն ու կոալիցիոն ուժերը՝ օդային հարվածների միջոցով: Թուրքական ԶՈՒ-ն պայքարում է նաև Սիրիայի հյուսիսում գործող քրդական ազգային խմբավորումների դեմ։
