Ստեփանակերտի երիտասարդության պալատում կայացել է «Դու մենակ չես» խորագրով «Հեղինակային երգեր» ակումբի բարեգործական համերգը:
Ստեփանակերտում կայացել է հեղինակային երգերի բարեգործական համերգ՝ «Դու մենակ չես» խորագրով
ՍՏԵՓԱՆԱԿԵՐՏ, դեկտեմբերի 24, ԱՐՑԱԽՊՐԵՍ: «Հեղինակային երգերի» ակումբը հանդես գալով «Դու մենակ չես» խորագրով բարեգործական համերգով, ցանկացել են այս նախաձեռնությունը որոշիչ մեկնակետ դարձնել արցախցի շվիահար 27-ամյա Հակոբ Բաբայանի բուժման համար. նա 6 տարեկանում ռումբի պայթյունից վիրավորվել էր, իսկ երկու տարի անց՝ կորցրել տեսողությունը: Այժմ տեսողությունը վերականգնելու և լիարժեք կյանքին վերադառնալու նրա միակ հույսը գերմանական Ֆրայբուրգի կլինիկայում բուժվելն է, որն իրականացնելու համար անհրաժեշտ է շուրջ 20 հազար եվրո:
Համերգի ողջ հասույթը տրամադրվում է Հակոբ Բաբայանին՝ նրա բուժման ծախսերը հոգալու համար:
«Հեղինակային երգերի» ակումբի հիմնադիր և ղեկավար, երաժիշտ, կիթառահար, երգչուհի Ջուլիետա Առուստամյանը
«Արցախպրես»-ի թղթակցի հետ զրույցում խոսելով իր գործունեության մասին, տեղեկացրել է, որ 2013 թվականի մարտից ինքն աշխատել է «Նարեկացի» արվեստի միության Շուշիի մասնաճյուղում` որպես «Հեղինակային երգի» դասարանի ուսուցիչ։
««Միության անմիջական օժանդակությամբ 2014 թվականին թողարկվել է «Աղոթք» ձայներիզը, որի մեջ պատերազմի ժամանակ և անմիջապես հետո ստեղծված իմ 10 գործերն են։ Ցավոք, այսօր այլևս չի գործում «Հեղինակային երգի» դասարանը: 2016 թվականի հուլիսի 1-ից մենք ելույթ ենք ունենում որպես առանձին ակումբ, որտեղ ընդգրկված է 15 հոգի: Արդեն ունենք գրանցված հաջողություններ. մեր ակումբի սաներից Մարիամ Անդրեասյանը մասնակցել է «Հուսո առագաստ» հեղինակային երգի համահայկական փառատոնին և հայտնվել լավագույն տասնյակում»,-նշել է Ջ. Առուստամյանը:
Համերգի ընթացքում կատարումներով հանդես է եկել «Հեղինակային երգերի» ակումբը, որին մասնակցել է նաև Հակոբը: