Դոնալդ Թրամփը իր կողմն է գրավում արտաքին քաղաքականության ոլորտի ծանրաքաշին:
Քիսինջերը պետք է կանխի նոր սառը պատերազմը
ՍՏԵՓԱՆԱԿԵՐՏ, դեկտեմբերի 28, ԱՐՑԱԽՊՐԵՍ: Նախկին արտգործնախարար առասպելական Հենրի Քիսինջերը պետք է ամբողջ աշխարհին բացատրի ԱՄՆ ապագա նախագահի արտաքին քաղաքական ծրագրերը, նաեւ այն, թե նա ինչ նկատի ուներ, երբ Twitter -ում ակնկարկում էր Ռուսաստանի հետ նոր միջուկային մրցավազքի մասին։ Պարբերականի տեղեկություններով, Քիսինջերը Ուկրաինայում իրավիճակի կարգավորման ծրագրի հեղինակն է համարվում, գրում է Bild –ը։
Քիսինջերը,- գրում է գերմանական տաբլոիդը,-կարող է միջնորդ դառնալ Մոսկվայի ու Վաշինգթոնի միջեւ։ Թրամփը մտադիր է մերձենալ Կրեմլի հետ։ Ըստ լուրերի, նախկին պետքարտուղարը արտասովոր սերտ կապեր ունի Կրեմլի առաջնորդի հետ»։
«Նոր սառը պատերազմի հնարավորությունը, նաեւ Թրամփի ու Չինաստանի միջեւ ներկա լարվածությունը, առավել արժեքավոր են դարձնում Քիսինջերի փորձառությունը»,- նկատում են հոդվածագրերը։
«Հենրի Քիսինջերը,- ասվում է հրապարակման մեջ,- Պուտինի հետ ծանոթացել է Բեռլինյան պատի քանդվելլուց հետո։ Ասում են, իբրեւ այն ժամանակ Քիսինջերը երիտասարդ ռուսին հարցրել էր նրա մասնագիտության մասին։ «Ես աշխատել եմ հատուկ ծառայություններում»,- պատասխանել է ԿԳԲ-ի նախկին աշխատակիցը։ Պուտինի կենսագրության մեջ գրված է, որ դրան Քիսինջերը պատասխանել է «Բոլոր կարգին մարդիկ սկսել են հատուկ ծառայություններից։ Ես նույնպես»։
«Քիսինջերը համարում է, որ Ռուսաստանի հետ հաշտեցումը ճիշտ քայլ է, որը կօգնի հակակշիռ ստեղծել Չինաստանի աճող ռազմական հզորությանը։ Ամերիկայի ու Ռուաստանի միջեւ հավասարակշռությունը կամրապնդի կայունությունն աշխարհում»,- գրում են հոդվածագրերը։
«Որոշ աղբյուրներ տեղեկացնում են, որ Թրամփը մտադիր է Քիսինջերի խորհուրդով չեղարկել հակառուսաստանյան պատժամիջոցները,- գրում է պարբերականը,- Ասւոմ են, թե նա նաեւ Թրամփին խորհուրդ է տվել ընդունել Ռուսաստանի գերազանցությունը նախկին խորհրդային երկրներում։ Այլ կերպ ասած՝ ԱՄՆ կարող է ընդունել ռուսական քաղաքական ազդեցությունը Լեհաստանից ու Բալթյան երկրներից մինչեւ Իրան, Աֆղանստան ու Չինաստան ընկած տարածքում»։
Ինչ վերաբերում է Ուկրաինային՝ ապա այստեղ կարող է քաղաքական ու տնտեսական զարգացման հարցերով ծրագիր մշակվել։ Դրա էությունն այն է, որ Ռուսաստանը երաշխավորում է անվտանգությունը Ուկրաինայի արեւելքում, աստիճանաբար հեռանալով այնտեղից։ Ի պատասխան՝ Արեւմուտքը այլեւս չի բարձրացնում Ղրիմի հարցը։
«Այն մասին, թե որքանով սերտ է Պուտինը կապված Թրամփի հետ, վկայում է եւս մեկ հատված հատուկ ծառայությունների համար պատրաստված փաստաթղթից, այնտեղ ասվում է, որ նախագահ Պուտինը կարող էր ցանկացած պահի կապվել Թրամփի հետ»,- փոխանցում է պարբերականը։
Հոլանդական Cicero Foundation վերլուծական հիմնադրամի Ռուսաստանի հարցերով մասնագետ Մարսել Վան Հերպենն այսպես է բացատրում Քիսինջերի մոտիվացիան․ «Նա իրատես է։ Նրա համար ավելի կարեւոր է միջազգային հավասարակշռությունը, այլ ոչ թե մարդու իրավունքներն ու ժողովրդավարությունը»։
