Փետրվարի 19-ը հայ մեծանուն բանաստեղծ Հովհաննես Թումանյանի ծննդյան օրն է. այդ օրը Հայաստանում և Արցախում նշվում է որպես գիրք նվիրելու օր:
Ի՞նչ խորհուրդ ունի գիրք նվիրելու օրը. պարզաբանում են քաղաքացիները
ՍՏԵՓԱՆԱԿԵՐՏ, փետրվարի 19, ԱՐՑԱԽՊՐԵՍ: Քաղաքացիներից փորձել ենք պարզել թե ի՞նչ խորհուրդ ունի գիրք նվիրելու օրը:
«Արցախպրես»-ի թղթակցի հետ զրույցում բանաստեղծ, թարգմանիչ, հրապարակախոս Հրանտ Ալեքսանյանն ասել է, որ հրաշալի տոն է գիրք նվիրելու օրը: «Մենք՝ հայերս, պիտի ընկալենք, որ մեր մշակութային արժեքներն ու հոգևոր հարստությունը մնայուն արժեքներ են: Պետք է մշտապես առիթներ և հնարավորություն ունենանք՝ գրքի արժեքն իմանալու և գնահատելու համար. հայ ժողովուրդը դարեր շարունակ պաշտել է գիրն ու գրականությունը և պատահական չէ, որ այդ պաշտամունքը տոնի է վերածել,-ասել է Հ. Ալեքսանյանը և ավելացրել,- այսօր ընթերցողները, կարծես թե, ավելի շատ նախընտրում են էլեկտրոնային ընթերցումները. ես դա էլ նորմալ եմ համարում: Գիրքն իր տպագիր տեսակի մեջ իսկապես այն լավագույն տարբերակներից մեկն է, որ առավելագույնս հարմարավետ է տեղեկություն ստանալու համար: Ես ինքս էլ եմ ընթերցում էլեկտրոնային գրականություն: Այսօրվա ընթերցողը գիրք կարդալու ավելի ժամանակակից հնարավորություններից է օգտվում: Անշուշտ, պետք է օգտվել ժամանակակից տեխնիկական միջոցներից՝ չմոռանալով սակայն ավանդականն ու մնայունը»:
Շուշիի տեխնոլոգիական համալսարանի քիմիայի դասախոս Ռուզաննա Հակոբյանը նշել է, որ այսօր երիտասարդների կապը գրքերի հետ թույլ է:
«Երիտասարդների մեծ մասը նախընտրում է օգտվել համակարգչային ընթերցանությունից: Այսօր մեծ խնդիր է նաև այն, որ ընթերցողները չեն կարդում հայկական գրականություն, այլ ավելի շատ նախընտրում են արտասահմանյանը: Հասարակությունը հայոց լեզվի լավ իմացության կարիք ունի. ըստ իս դա կարելի է լրացնել նաև գրքեր ընթերցելու միջոցով: Կցանկանայի նաև, որ գրադարան-ընթերցող կապն ավելի ամրապնդվի»,- ասել է Ռ. Հակոբյանը և ընդգծել, որ ինքը մեծ տեղ ու նշանակություն է տալիս գրքերին՝ մանավանդ մասնագիտական գրականությանը:
Ստեփանակերտի «Գրքեր» գրախանութի աշխատակից Սամվել Պետրոսյանը մեզ հետ զրույցում ասել է, որ արցախցիները ներկայումս ավելի շատ են օգտվում համակարգչային ընթերցանությունից, որն պայմանավորված է երիտասարդների՝ ամբողջովին համակարգչից կախված լինելու փաստով։
«Այսօր՝ գիրք նվիրելու օրը, այցելուների մեծ շարժ է նկատվում: Հաճախորդները հիմնականում երիտասարդներն են, ովքեր նախընտրում են արտասահմանյան գրականություն, իսկ տարեցները նախընտրում են տարբեր թերթեր ու ամսագրեր»,-ասել է Ս. Պետրոսյանը և տեղեկացրել, որ իրենք հիմնականում կարողանում են անհրաժեշտ գրքերով բավարարել այցելուների պահանջները: