Ստեփանակերտի մշակույթի և երիտասարդության պալատի նախաձեռնությամբ երեկ կայացել է «Գրացիա» պարային փառատոնի բացման արարողությունը՝ նվիրված պարուսույց Ելենա Սարգսյանի հիշատակին:
Ստեփանակերտում կայացել է «Գրացիա» պարային փառատոնի մեկնարկը (լուսանկարներ)
ՍՏԵՓԱՆԱԿԵՐՏ, մարտի 15, ԱՐՑԱԽՊՐԵՍ: Փառատոնին հանդես են եկել Արցախի պարի պետական համույթի, Հակոբ Գյուրջյանի անվան արվեստի դպրոցի, Ստեփանակերտի մանկապատանեկան ստեղծագործական կենտրոնի, պարարվեստի քոլեջի սաները:
Միջոցառման մասնակիցները փառատոնին ներկայացրել են Ելենա Սարգսյան-անհատին՝ բնութագրելով նրան, որպես օրինակելի, կիրթ, գրագետ, պահանջկոտ մարդու. ժամանակակիցները նրա մասին կիսվել են նաև հիշողություններով, ցուցադրվել է նրա մասին պատմվող լուսանկարներ:
«Արցախպրես»-ի թղթակցի հետ զրույցում ԱՀ մշակույթի և երիտասարդության հարցերի նախարար Նարին Աղաբալյանն ասել է, որ Ելենա Սարգսյանի նման մարդկանց նվիրված միջոցառումները շատ կարևոր են:
«Ինձ բախտ չի վիճակվել աշխատելու Ե. Սարգսյանի հետ, բայց փոքր հասակում բախտ եմ ունեցել ապրել նրա հարևանությամբ. նրա լուսավոր կերպարը մնացել է իմ մանկական հուշերի մեջ: Արվեստի հետ իմ առաջին կենդանի շփումը ևս նրա միջոցով է իրականացվել: Շատ կարևոր է, որ մենք հիշում ենք մեր արվեստագետներին, մեր մեծերին, ովքեր կարևոր դերակատարություն են ունեցել Արցախի մշակույթի զարգացման գործում: Այն, որ այսօր մենք կարողանում ենք պարի փառատոն կազմակերպել՝ ունենալով մեծ թվով մասնակիցներ, նշանակում է, որ զուր չեն եղել նրա և մեր մյուս պարարվեստ ուսուցանողների թափած ջանքերը: Այս փառատոնը հարգանքի յուրօրինակ տուրք է Ե. Սարգսյանի հիշատակին»,-ասել է Ն. Աղաբալյանը:
«Մենք միասին ենք աշխատել:
Ես հիացած եմ եղել նրանով՝ որպես մարդու, պարուսույց- մանկավարժի: Հպարտ եմ, որ ճանաչել եմ Ե. Սարգսյանին:
Նա խստապահանջ, արդար և ազնիվ մարդ էր»,-ասել է Ստեփանակերտի պարարվեստի քոլեջի տնօրեն Ստելլա Զաքարյանը:
Ստեփանակերտի պարարվեստի քոլեջի դասական պարերի բաժնի վարիչ, վաստակավոր արտիստ Տատյանա Միրզոյանն էլ իր խոսքում նշել է, որ փառատոնն ստացել է «Գրացիա» անվանումը, որովհետև բոլոր մրցույթներին, որոնց մասնակցում էին Ե. Սարգսյանի աշակերտները, խումբը հանդես էր գալիս այդ անունով:
«Արցախում պարարվեստի զարգացման գործում անգնահատելի է Ե. Սարգսյանի աշխատանքն ու նվիրումը:
Ե. Սարգսյանը հիանալի անձնավորություն էր՝ դրական, ազնիվ, համեստ, խիստ, խելացի, բարեհոգի: Նա հասցնում էր լինել ամենուր և անել, ամեն ինչ. որտեղ աշխատել է նա, այնտեղ լուրջ արդյունքների է հասել: Իսկ Ե. Սարգսյանը պարարվեստի բնագավառում աշխատել է շուրջ 25 տարի: Ելենան ինձ համար եղել է և՛ հարազատ բարեկամ, և՛ ընկերուհի, և՛ խորհրդատու և՛ ուսուցիչ: Նա եղել է օրինակելի մարդ, հոգատար և անզուգական մայր,հավատարիմ կին, փորձված մանկավարժ»,-ասել է Տ. Միրզոյանը:
Միջոցառմանը ներկա էին ԱՀ կրթության, գիտության և սպորտի նախարար Սլավա Ասրյանը, պարուսույցներ, արվեստասեր հասարակության ներկայացուցիչներ, աշակերտներ և այլք:
Նշենք, որ մարտի 24-ին կկայանա «Գրացիա» պարային փառատոնի ժողովրդական փուլը, մարտի 31-ին՝ դասական և ժամանակակից փուլը, իսկ ապրիլի 6-ին էլ տեղի է ունենալու գալահամերգը: Փառատոնին մասնակցելու են Մարտունու, Մարտակերտի, Շուշիի, Ասկերանի, Հադրութի շրջանների, ինչպես նաև Ստեփանակերտի արվեստի դպրոցների սաները:
