ԱՀ մշակույթի և երիտասարդության հարցերի նախարարության աջակցությամբ և Համազգային հայ կրթական և մշակութային միության հովանավորությամբ՝ երեկ Ստեփանակերտի մշակույթի և երիտասարդության պալատում կայացել է Սոս Սարգսյանի անվան համազգային թատրոնի «44 աստիճանի վրա» ներկայացումը:
Սոս Սարգսյանի անվան համազգային թատրոնը հյուրախաղերով հանդես է եկել Արցախում (լուսանկարներ)
ՍՏԵՓԱՆԱԿԵՐՏ, մարտի 18, ԱՐՑԱԽՊՐԵՍ: Միջոցառմանը բացման խոսքով հանդես է եկել Սոս Սարգսյանի անվան համազգային թատրոնի տնօրեն Վարդան Մկրտչյանը
Նա ասել է, որ նույն ներկայացմամբ իրենք հանդես են եկել նաև Քարվաճառում, Մարտակերտում և Մարտունիում:
«Հոգիս փառավորվում է՝ տեսնելով Արցախում այսքան հանդիսատես: Արցախը մեր տունն է, և մենք նորից այստեղ ենք՝ մեր տանը՝ այս անգամ արդեն նոր հյուրախաղերով: Մեր թատրոնի 25-ամյակի կապակցությամբ այս հյուրախաղերը մի փոքրիկ մասն է մեր մեծ նախաձեռնությունների: Ամեն անգամ, երբ գալիս ենք Արցախ, նոր լիցք ենք առնում, հանդես գալիս նոր գաղափարներով ու ծրագրերով,-իր խոսքում ասել է Վ. Մկրտչյանը և հավելել,- իրականում այս ներկայացումն արցախցիների մասին է, սահմանում ապրող, արարող մարդկանց մասին, և դա է պատճառը, որ ընտրեցինք հենց «44 աստիճանի վրա» բեմադրությունը: Սահմանը պահելը միայն այնտեղ ապրող մարդկանց խնդիրը չէ, այլ նաև մերը. մենք էլ մեր արվեստի միջոցով փորձում ենք ուժ և ոգևորությամբ տոգորել նրանց: Մենք նոյեմբերի վերջին նոր ներկայացումներով կրկին հանդես ենք գալու Արցախում»:
Ներկայացումը մի հյուղակում ապրող հայրենադարձ Մգրոյի և նրա կնոջ՝ Սիրանույշի մասին է, որոնք, հանուն իրենց հայրենիքի, հրաժարվել են ամերիկյան իրենց բարեկեցիկ կյանքից, վերադարձել հայրենիք:
«Արցախպրես»-ի թղթակցի հետ զրույցում Սոս Սարգսյանի անվան համազգային թատրոնի դերասանուհի Տաթև Ղազարյանը (Սիրանույշ) ասել է, որ ներկայացման սցենարը Տիգրան Հայրապետյանի համանուն պատմվածքի հիման վրա է գրված, որն էլ պիեսի է վերածել Հասմիկ Սիմոնյանը:
«Այս ներկայացումը 14 տարի է, ինչ համազգային թատրոնի բեմում է: Տարբեր երկրներում ենք եղել՝ միշտ էլ արժանանալով ջերմ ընդունելության, այդ առումով բացառություն չէ նաև արցախցիների ընդունելությունը: Ներկայացումը բավականին մեծ ազդեցություն է թողնում նամանավանդ գաղթօջախներում, քանի որ այնտեղ իրենց առօրյա խնդիրների մասին է խոսվում: Ներկայացման սկզբից մենք կարողացանք գրավել արցախցի խստապահանջ հանդիսատեսի ուշադրությունը, և այն չթուլացավ մինչև ներկայացման ավարտը: Ապրեն արցախցիները, որ մեր ներկայացման նման մեղուների պես կառչած են մայր հողից և շարունակում են այն ամրապնդել»,-ասել է Տ. Ղազարյանը:
Դերասան Վարշամ Գևորգյանն (Մգրո) էլ նշել է, որ ամեն ներկայացման ժամանակ իրենք յուրովի են ներկայանում:
«Շատերն ասում են, որ այս ներկայացումն արտագաղթի մասին է, իսկ ես հակված եմ այն մտքին, որ այնտեղ ներգաղթի գաղափարն է արծարծված: Մենք հույս ենք փայփայում, որ կգա այն օրը, երբ բոլորը կվերադառնան իրենց հայրենիքը: Յուրաքանչյուրս մեր իսկ գործով, աշխատանքով, արվեստով պիտի հզորացնենք, շենացնենք ու զարգացնենք մեր հայրենիքը»,-ասել է Վ. Գևորգյանը:
Մյուս դերասանը՝ Կարեն Խաչատրյանն (Կարապետ) էլ ասել է, որ իր կերպարի ամբողջ ողբերգությունն այն է, երբ մարդ հայտնվում է անելանելի վիճակում:
«Մենք լավ գիտենք, թե ինչ ենք ուզում, բայց ելքը չգիտենք. ուժեղ պետք է լինենք, որ կարողանանք դիմակայել կյանքի բոլոր մարտահրավերներին. չէ՞-որ կյանքը հավերժ պայքար է:
Ողջ ներկայացման շեշտադրումն այն է՝ չլքել հայրենիքը, շարունակել կառչած մնալ հողից, արմատներ ձգել ու ճյուղարձակել»,-մասնավորապես ասել է Կ. Խաչատրյանը:
Միջոցառմանը ներկա էին ԱՀ մշակույթի և ե րիտասարդության հարցերի փոխնախարար Գայանե Գրիգորյանը, պատգամավորներ, արվեստասեր հասարակություն և այլք:
