Եվրոպացի մասնագետները երեք տարվա ընթացքում կսովորեցնեն անօդաչու թռչող սարքեր պատրաստելու մեթոդները։
ԵՄ–ն Հայաստանին կսովորեցնի անօդաչու թռչող սարքեր արտադրել
ՍՏԵՓԱՆԱԿԵՐՏ, ապրիլի 6, ԱՐՑԱԽՊՐԵՍ: Եվրամիությունը երիտասարդ հայ մասնագետներին կսովորեցնի անօդաչու թռչող սարքեր պատրաստել, armeniasputnik.am-ի հաղորդմամբ՝ հայտնում է Digital Report-ը։
Արևելյան գործընկերության երկրներում մեկնարկել է eDrone նախագիծը («Անօդաչու թռչող սարքերի ուսումնասիրություն»), որի նպատակն է փոխացնել Արևմուտքի փորձը տեղեկատվական տեխնոլոգիաների ոլորտում և օգնել ուսումնական կենտրոններ բացել անօդաչու թռչող սարքերի (ԱՍԹ) ուսումնասիրության և պատրաստման համար։
Նախագիծը մեկնարկել է Հայաստանում, Վրաստանում, Բելառուսում և Մոլդովայում։ 1 միլիոն արժողությամբ ծրագիրը ֆինանսավորում է Եվրամիությունը։
Նախաձեռնությունը միավորում է ութ երկրի, չորսը՝ Եվրամիությունից (Իտալիա, Ֆրանսիա, Լեհաստան, Ռումինիա), չորսն էլ՝ հետխորհրդային տարածքից (Հայաստան, Վրաստան, Մոլդովա, Բելառուս)։ Երեք տարի տևողություն ունեցող նախագծի ընդհանուր բյուջեն 1 միլիոն եվրո է կազմում։ Գումարը բաշխվելու է մասնակից երկրների 17 համալսարանների ու ընկերությունների միջև։ Եռամյա ծրագրի արդյունքում երկրները կմշակեն սեփական կրթական ծրագրերը և իրենց հիմքի վրա կստեղծեն անօդաչու թռչող սարքերի ուսումնասիրության կենտրոններ։
eDrone նախագծին կմասնակցի երկու բուհ` Հայաստանի պետական ճարտարագիտական և Հայաստանի պետական տնտեսագիտական համալսարանները։ Առաջինում կստեղծվի լաբորատորիա, երկրորդը ծրագրի տնտեսական հիմնավորմամբ կզբաղվի։
Հրաչյա Կարապետյանի (Պետական ճարտարագիտական համալսարան) խոսքով՝ ծրագրի նպատակն է երիտասարդ մասնագետներին սովորեցնել աշխատել անօդաչու թռչող սարքերի հետ, որպեսզի երիտասարդները կարողանան դրանք լավ կառավարել և ծանոթ լինեն կառուցվածքին։
«Մեր համալսարանը լավ հիմք ունի։ Մի քանի տարի առաջ «AirArmenia» ավիաընկերությունը պատրաստ էր մեզ սարքավորում տրամադրել, որը մենք կկարողանաինք օգտագործել ուսման ընթացքում։ Բայց այն ժամանակ համալսարանը ազատ տարածք չուներ` թեկուզ տարրական պայմաններով։ eDrone ծրագրի շնորհիվ մենք կկարողանանք ստեղծել լաբորատորիա, որտեղ ուսանողները կկարողանան ուսման կուրս անցնել։ Այդ նպատակով մեր համալսարանին տրամադրվել է 50 հազար եվրո։ Շուտով մենք մրցույթ կհայտարարենք անհրաժեշտ սարքավորումները գնելու համար», —ասաց Կարապետյանը։
ՏՏ ոլորտի ներկայացուցիչների խոսքով՝ երկիրը հույսեր է կարում ԱԹՍ-ի հետ. շուտով դպրոցներում նույնպես կսկսեն սովորեցնել անօդաչու թռչող սարքեր պատրաստել։
«Մենք պատրաստվում ենք դպրոցական ծրագրում ներառել «ԱԹՍ ծրագրավորում» առարկան։ Դա կավելացնի այդ համակարգերը ծրագրավորող և կառավարող մասնագետների թիվը։ Անօդաչու թռչող սարքերը շուտով անհրաժեշտ կդառնան շատ ոլորտներում», — ասաց Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը։
Նա կարծում է, որ երկիրը մեծ ապագա ունի ԱԹՍ արտադրության ոլորտում։
«Կարծում եմ, հինգ տարի անց Հայաստանն անօդաչու թռչող սարքեր արտադրող երկների ցանկում առաջատարներից մեկը կլինի»,- նշեց Վարդանյանը:
