«Գլոբբինգի»-ի արցախյան մասնաճյուղը կօգնի Արցախում մատչելի տարբերակով օգտվել միջազգային խանութների օնլայն հարթակից»:
Արցախում բացվել է ամերիկյան «Գլոբբինգ» ընկերության գրասենյակը
ՍՏԵՓԱՆԱԿԵՐՏ, 10 ապրիլի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ամերիկյան «Գլոբբինգ» ընկերության Արցախի գրասենյակի տնօրեն Վահրամ Բաղդասարյանը:
«Արցախում արդեն 2 ամսից ավել է, ինչ գործում է ամերիկյան «Գլոբբինգ» ընկերության գրասենյակը: Այն հիմնադրել ենք երկուսով՝ ես և Գևորգ Առուշանյանը: Մեր նպատակն է՝ Արցախի հասարակությանը օգնել գնումներ կատարելու և արտասահմանյան այն օնլայն խանութներից, որոնք չունեն առաքման ծառայություն Հայաստանում և Արցախում,- ասել է Վ. Բաղդասարյանը և հավելել,- նախքան «Գլոբբինգ»-ի այստեղ հիմնադրվելուն, Արցախից եղել են հաճախորդներ, ովքեր օգտվում էին երևանյան գրասենյակից, սակայն դա ֆինանսապես անարդյունավետ էր և ծախսատար:
Պատճառն այն է, որ առաքումը հասնում էր Երևան, և ապրանքը այնտեղից տեղափոխելը արցախցի հաճախորդի համար խնդիր էր դառնում: Այժմ այն մատչելի է. հաճախորդը վճարում է այնքան, ինչքան պատվիրված ապրանքը Երևանում ստանալու դեպքում կվճարեր»:
Անդրադառնալով այն հարցին, թե ինչպե՞ս է կատարվում պատվիրումն ու առաքումը, Վ. Բաղդասարյանը պարզաբանում է. «Գրանցվելով կայքում՝ հաճախորդը ստանում է անհատական հասցե: Այնուհետև կատարում է ընտրություն որևէ օնլայն խանութից, և պատվերը առաքվում է մեր արտասահմանյան պահեստ, այնտեղից էլ տեղափոխվում մեզ մոտ: Գնումը և տեղափոխումը կատարվում են ԱՄՆ-ից, Անգլիայից և Ռուսաստանից՝ ստանդարտ և էքսպրես եղանակով: Էքսպրես տարբերակով ԱՄՆ-ից և Անգլիայից առաքումը կատարվում է 5-10 աշխատանքային օրում, իսկ Ռուսաստանից՝ 5 օրում: Ստանդարտ տարբերակով ԱՄՆ-ից առաքումը տևում է 65 օր, իսկ Ռուսաստանից՝ 6-10 օր»:
Նշենք, որ արդեն մի քանի տարի է, ինչ ամերիկյան «Գլոբբինգ» ընկերությունը մուտք է գործել նաև Հայաստան: Սա միջազգային նախագիծ է, որի նպատակն է մշակել ու կիրառել գործիքներ ու մեխանիզմներ, որոնք թույլ կտան մարդկանց գնումներ կատարել աշխարհի ցանկացած երկրից՝ անկախ բնակության վայրից, համակարգչային ու լեզվական հմտություններից կամ այլ սահմանափակումներից: «Գլոբբինգ»-ի նպատակն է՝ ստեղծել գնումներ կատարելու նոր մշակույթ, որը չի ճանաչի խոչընդոտ, սահման ու սահմանափակում ու կտա մարդկանց ազատություն՝ գնումներ կատարելու իրենց իսկ կանոններով: