Մարտունու շրջանի Ճարտար քաղաքի 57-ամյա բնակչուհի Գրետա Խաչատրյանի ընտանիքը ԿԽՄԿ Ստեփանակերտի գրասենյակի շահառուներից է:
Ճարտարի 57-ամյա բնակչուհին գոհ է ԿԽՄԿ Ստեփանակերտի գրասենյակի աջակցությունից (լուսանկարներ)
ՍՏԵՓԱՆԱԿԵՐՏ, 22 ապրիլի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Գրետա Խաչատրյանը պատմել է, որ որդին՝ 13-ամյա Մասիս Խաչատրյանը, 1996 թվականին Մարտունու շրջանի «Վեսալու» կոչվող տեղանքում ականի պայթյունից մահացել է:Դեպքից մեկ տարի անց կորցրել է նաև աղջկան, ով համադասարանցիների հետ ամառային հանգստի էր գնացել «Գիշվա գյոլ» կոչվող տեղանք, որտեղ ընկերուհուն օգնելու պահին խորտակվել է ջրում և մահացել:
«Շատ ծանր եմ տարել երեխաներիս կորուստը: Առողջությունս կտրուկ վատացել է, ինչից հետո էլ ինսուլտ եմ ստացել: Հիվանդության պատճառով 3 տարի նպաստ էի ստանում, սակայն այն այլևս չեն տրամադրում: Երեք ամուսնացած աղջիկ ունեմ. Փոքրն ամուսնալուծված է, 2 երեխաների հետ մեզ մոտ է ապրում: Նա դպրոցում հավաքարար է աշխատում: Մեր տանը ապրում ենք 6 հոգով. 67-ամյա ամուսինս ընդամենը 40.000 դրամ թոշակ է ստանում: Նա ևս առողջական լուրջ խնդիրներ ունի, իսկ 61-ամյա տալս ամսական 19000 դրամ նպաստ է ստանում»,- ասել է Գ. Խաչատրյանը:
Մեր զրուցակցի խոսքով, ԿԽՄԿ-ն 2015 թ.-ին 400.000 դրամ օգնություն է տրամադրել: Այդ գումարով կով և խոտ են գնել. կովն արդեն 3 անգամ հորթ է ծնել, ինչը զգալիորեն թեթևացրել է ընտանիքի հոգսերը:
«Ցանկանում եմ իմ խորին շնորհակալությունը հայտնել Կարմիր խաչին օգության ձեռք մեկնելու համար»,- ասել է Գ. Խաչատրյանը: