ԱՀ մշակույթի և երիտասարդության հարցերի նախարարության նախաձեռնությամբ ապրիլի 27-ին Արցախում մեկնարկած «Արվեստը հանուն խաղաղության» (Arts for Peace) խորագրով միջազգային նախագծի շրջանակներում Ստեփանակերտի Սայաթ-Նովայի անվան երաժշտական քոլեջում այսօր անց են կացվել ջութակի և կլարնետի վարպետության դասեր:
Սայաթ-Նովայի անվան երաժշտական քոլեջում այսօր անց են կացվել ջութակի և կլարնետի վարպետության դասեր
ՍՏԵՓԱՆԱԿԵՐՏ, 29 ապրիլի, ԱՐՑԱԽՊՐԵՍ: «Արցախպրես»-ի թղթակցի հետ զրույցում քոլեջի վեց աշակերտների հետ ջութակի վարպետության դասեր անցկացրած դիրիժոր Չրտոմիր Շիշկովիչը ասել է, որ հիացած է ստեղծված պայմաններով և արվեստի հանդեպ արցախցի երիտասարդ երաժիշտների ունեցած հետաքրքրությամբ:
«Եվրոպայում կա կարծիք, որ Եվրոպայից արևելք ընկած երկրներում երաժշտության ուսուցումը ավելի ցածր մակարդակի վրա է, սակայն այն ինչ տեսա ձեր երաժշտական ուսումնարանում կազմակերպվածության առումով, կարող եմ ասել, որ նույնիսկ Իտալիայում չեմ տեսել»,- ասել է ջութակահար, դիրիժոր Չրտոմիր Շիշկովիչը և հավելել, որ Ստեփանակերտը ևս շատ է հավանել:
Լյուբլյանայի երաժշտական ակադեմիայի դասախոս, կլարնետահար Յոժե Կոտարը ասել է, որ մեծ հաճույքով է աշխատել քոլեջի սաների հետ: «Վարպետության դասեր ենք անցկացրել կլարնետի բաժնի հինգ ուսանողների հետ: Ընդհանուր առմամբ ուսանողների մոտ գործիքին տիրապետելու հմտությունները տարբեր մակարդակների վրա են, սակայն բոլորն էլ տաղանդավոր են և միանգամից ընկալում և հասկանում են տրված խորհուրդներն ու բացատրությունները: Պետք է շատ աշխատեն և կատարելագործվեն, և այս առումով, կարծում եմ, դրսից եկած մասնագետների հետ աշխատելը շատ օգտակար կլինի նրանց համար»,- ասել է սլովենացի մասնագետը:
Կլարնետի բաժնի 4-րդ կուրսի ուսանող Էնրիկի Ոսկանյանն ասել է, որ մեծ հաճույքով է լսում և սովորում իրեն տրված դիտողություններն ու մասնագիտական ցուցումները: «Ուսումնարանն ավարտելուց հետո ցանկանում եմ ուսումս շարունակել Երևանի պետական կոնսերվատորիայում և վստահ եմ, որ ինձ տրված վարպետության դասերը կօգնեն էլ ավելի հմտանալ և շտկել մասնագիտական թերությունները»,- ասել է երաժշտական քոլեջի սանը:
Նշենք, որ վաղը՝ ապրիլի 30-ին, տեղի կունենա «Արվեստը հանուն խաղաղության» (Arts for Peace) խորագրով միջազգային նախագծի փակման հանդիսավոր արարողությունը, որը կեզրափակվի Ստեփանակերտի մշակույթի և երիտասարդության պալատում կայանալիք համերգային ծրագրով: