Բուենոս Այրեսի քաղաքային խորհուրդը պատվավոր ընդունելության է արժանացրել ջութակահար Արա Մալիքյանին:
Բուենոս Այրեսի քաղաքային խորհուրդը հանդիսավոր ընդունելության է արժանացրել ջութակահար Արա Մալիքյանին
ՍՏԵՓԱՆԱԿԵՐՏ, 26 մայիսի, ԱՐՑԱԽՊՐԵՍ: Prensa Armenia-ի փոխանցմամբ՝ հունիսի 15-ին Մալիքյանն Արգենտինայի մայրաքաղաքում ելույթ է ունենալու:
«Մալիքյանի կյանքը մշտապես դժվարությունները հաղթահարելու օրինակ է, օրինակ, որ ջանքերն արդյունք են տալիս»,- արարողության ժամանակ ասել է պատգամավոր Դանիել Պրեստին:
Մալիքյանն իր հերթին հիշել է, թե իր հայրը որքան է սիրում լսել Աստոր Պիացոլլայի տանգոն: Նա նույնիսկ չգիտեր՝ որտեղ է Արգենտինան, պարզապես, ըստ ջութակահարի, շատ էր սիրում այդ երաժշտությունը: Հարցին՝ որտեղի՞ց է, նա միշտ պատասխանում է. «Ես մի քիչ լիբանանցի եմ, հայ, իսպանացի եւ նավահանգստային քաղաքի բնակիչ»:
«Ինձ համար շատ կարեւոր է նվագել Բուենոս Այրեսում, քանի որ այստեղ երբեք չեմ նվագել, չնայած միշտ երազել եմ: Իհարկե՝ վաղուց շատ լավ գիտեմ արգենտինական երաժշտական մշակույթը, կոմպոզիտորներին, այստեղ շատ ընկերներ ունեմ»,- ասում է Մալիքյանը:
Արա Մալիքյանը լիբանանահայ ջութակահար է, ներկայում Իսպանիայում է բնակվում: Նա ավելի քան 20 ալբոմ է ստեղծել, ելույթ ունեցել աշխարհի ավելի քան 40 երկրներում: Նրա մանկությունն անցել է Լիբանանի քաղաքացիական պատերազմի տարիներին: Այդ մասին նա այսպես է հիշում. «Ռմբակոծությունների միջեւ դադարների ժամանակ մարդիկ ասում էին. խաղաղ օր ստացվեց, համերգ կազմակերպենք»:
15 տարեկանում նա Գերմանիայի կառավարությունից կրթաթոշակ է ստանում՝ Հանովերի երաժշտական դպրոցում սովորելու համար ու դառնում ամենաերիտասարդ աշակերտը: «Այս ջութակի շնորհիվ իմ ընտանիքն ասելու բան ունի: Համերգի ժամանակ ես պատմում եմ այդ պատմությունը»,- ընդգծում է Մալիքյանը:
