Թբիլիսիում, Հայ Առաքելական Ուղղափառ Սուրբ Եկեղեցու Վիրահայոց թեմի «Հայարտուն» կենտրոնի Գալուստ Գյուլբենկյան սրահում, կայացել է հանդիպում հայտնի բանաստեղծ ու գեղանկարիչ Արևշատ Ավագյանի հետ:
Բազմատաղանդ գրողին ու արվեստագետին մեծարել են Վիրահայոց թեմի «Հայարտուն» կենտրոնում
Թբիլիսիում, Հայ Առաքելական Ուղղափառ Սուրբ Եկեղեցու Վիրահայոց թեմի «Հայարտուն» կենտրոնի Գալուստ Գյուլբենկյան սրահում, կայացել է հանդիպում հայտնի բանաստեղծ ու գեղանկարիչ Արևշատ Ավագյանի հետ:
Այս մասին «Արցախպրես»-ին տեղեկացրեց Վիրահայոց թեմի մամլո ծառայությունը՝ նշելով, որ հանդիպումը ներդաշնակված էր բանաստեղծ-նկարչի աշխատանքների ցուցահանդեսին:
Վիրահայոց թեմի «Հայարտուն» կենտրոնի աջակցությամբ կազմակերպված՝ Վրաստանի հայ գրողների «Վերնատուն» միության ու Վրաստանի հայ նկարիչների միության համատեղ այդ միջոցառման նպատակն էր թբիլիսյան հասարակությանը ներկայացնել արվեստի լիահուն պաթոսով ապրող՝ նորի ու առաջավորի ջատագով ու կրող հայ ստեղծագործողին:
Միջոցառումը բացել է «Վերնատան» նախագահ Գևորգ Սնխչյանը՝ ի մասնավորի անդրադարձ կատարելով Արևշատ Ավագյանի կյանքի անցած ուղուն, նրա բանաստեղծական 25 ժողովածուներին, գեղանկարչական 90 աշխատանքներին, հրատարակած գրքերին, կազմակերպած ցուցահանդեսներին:
Բանախոսները՝ բանաստեղծ Միքայել Ախտյանը, բանաստեղծ-թարգմանիչ Գիվի Շահնազարը, բանաստեղծ, թարգմանիչ Անահիտ Բոստանջյանը, մանրանկարիչ Մերուժան Շահումյանը Արևշատ Ավագյանին բնութագրեցին որպես ավանգարդիստ ստեղծագործողի, նորարարական մոտեցմամբ անձնավորության, ակտիվ հասարակական գործչի, բանիմաց գրականագետի, ՀՀ Մշակույթի հիմնադրամի տնօրենի և Մշակույթի խորհրդարանի անդամի: Կարևորվեց նրա պոեզիայի վրացերեն թարգմանության բարձրարժեք հնչեղությունը: