Բոլոր ժամանակներում կարևորել եմ նաև հայրենի մշակույթի մի մասը կազմող նկարիչ-քանդակագործների աշխատանքը:
Արվեստագետը պետք է քայլի ժամանակի պահանջներին համահունչ. Ալբերտ Հարությունյան (լուսանկարներ)
ՍՏԵՓԱՆԱԿԵՐՏ, 3 հոկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Արցախի Հանրապետության վաստակավոր նկարիչ-քանդակագործ, Արցախի նկարիչների միության անդամ, Ստեփանակերտի պատվավոր քաղաքացի 82-ամյա Ալբերտ Հարությունյանը:
«Ես Արցախի առաջին քանդակագործներից եմ: 1958 թվականից եմ Երևանից տեղափոխվել Ստեփանակերտ: Որպես նկարչության ուսուցիչ՝ աշխատել եմ Ստեփանակերտի գիշերօթիկ դպրոցում:
Ունեցել եմ աշակերտներ, որոնց փոխանցել եմ իմ արվեստը: Ունեցածս 5 արհեստանոցներից վերջինը ես եմ կառուցել: Կարծում եմ՝ նկարիչը պետք է կարողանա պատկերել իր ժողովրդի բոլոր ապրումները՝ ուրախությունը, երազանքը, ցավն ու հոգսը. արվեստագետը նաև պետք է քայլի ժամանակի պահանջներին համահունչ. նա իր աշխատանքներում պետք է հոգի դնի,-ասել է Ա. Հարությունյանը և հավելել,-քանդակներս պատրաստում եմ գրանիտից, պղնձից, գիպսից. օգտագործում եմ նաև այլ նյութեր: Շատ դեպքում էլ քանդակն է պահանջում, թե ինքնինչ նյութից պետք է պատրաստվի»,-ասել է քանդակագործը:
Խոսելով իր քանդակների մասին՝ Ա. Հարությունյանն ասել է, որ ինքն իր ամենահաջողված գործը համարում է Մուրացանի կիսանդրին և Բերդաշենի հուշահամալիրը. ի դեպ, դրանք արվեստագետների կողմից էլ են գնահատվել որպես լավագույն աշխատանքներ: «Հայրենական մեծ պատերազմի հերոսների հիշատակին նվիրված Արցախի շուրջ 35 գյուղում քանդակներ ու հուշարձաններ ունեմ տեղադրած:
Ադրբեջանի իշխանության տակ գտնվելու տարիներին՝ հայ մեծ գրող Մուրացանի կիսանդրին պատրաստելու ժամանակ, լուրջ խոչընդոտների եմ հանդիպել, բայց կարողացել ենք հաղթահարել արգելքները, և այսօր գրողի վեհաշուք կիսանդրին հպարտ բազմած է Շուշիի Մուրացանի անվան դպրոցի բակում: 1972 թվականին իմ կառուցած Բերդաշենի հուշահամալիրը, որի վրա աշխատել եմ 8 տարի, իր կատարելությամբ ԽՍՀՄ-ում համարվել է երկրորդը: 1999 թվականին Մուրացանի կիսանդրու կառուցման և Բերդաշենի հուշահամալիրի համար արժանացել եմ ԼՂՀ կառավարության Եղիշեի անվան ամենամյա մրցանակի»,-մանրամասնել է Ա. Հարությունյանը:
Անդրադառնալով առաջիկա ծրագրերին՝ նկարիչ-քանդակագործը նաև նշել է. «Ստեփանակերտի Ադմիրալ Իսակով փողոցում պետք է հուշարձան տեղադրվի. դրա փոքր տարբերակն արդեն քանդակել եմ գիպսի վրա. այն հետագայում ավելի մեծ չափսերով մարմարից պիտի քանդակվի:
Մարտակերտում էլ տեղադրվելու է ապրիլյան քառօրյա պատերազմի հերոս Գեղամ Մանուկյանի հիշատակին նվիրված հարթաքանդակը: Մեծ հայրենականի 24 հերոսների կիսանդրիները պետք է վերականգնեմ, որպեսզի դրանք տեղադրվեն Ստեփանակերտի եղբայրական հուշահամալիրում:
Արդեն իսկ ավարտել եմ Արցախի հերոս Աշոտ Ղուլյանի (Բեկոր) կիսանդրու քանդակը, որը տեղադրվելու է Շուշիի՝ նրա անունը կրող փողոցում»:
Ա. Հարությունյանը մասնակցել է տարբեր ցուցահանդեսների: Արվեստագետը նպատակ ունի կազմակերպել նաև անհատական ցուցահանդեսներ:
