Նոյեմբերի 17-ին Ստեփանակերտում մեկնարկել է «Ճամփորդ» հասարակական հիմնադրամի, ՀՀ և ԱՀ պաշտպանության նախարարությունների և Արցախում մարդու իրավունքների հիմնադրամի նախաձեռնությամբ կազմակերպված «Լրագրողը՝ որպես օբյեկտիվ հենասյուն օնլայն և օֆլայն պատերազմական իրավիճակներում» թեմայով սեմինարը:
Ստեփանակերտում մեկնարկել է «Լրագրողը՝ որպես օբյեկտիվ հենասյուն օնլայն և օֆլայն պատերազմական իրավիճակներում» թեմայով սեմինարը
ՍՏԵՓԱՆԱԿԵՐՏ, 18 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ սեմինարին ողջույնի խոսքով տեսակապով հանդես է եկել «Ճամփորդ» հասարակական հիմնադրամի հիմնադիր Արիանե Կաոլին:
Մեզ հետ զրույցում հիմնադրամի տնօրեն Գոհար Հայրապետյանը նշել է, որ բացի ՀՀ-ից, միջոցառմանը ներգրավվել են նաև միջազգային փորձագետներ ՌԴ-ից և Ֆրանսիայից, ովքեր ներկայացնելու են լրագրության նոր մարտահրավերներն ու խնդիրները:
Խոսելով լրագրողների ընտրության մասին՝ նա նշել է, որ ընտրվել են այն լրագրողները, ովքեր առավելագույնս համապատասխանում էին չափանիշներին:
Գ. Հայրապետյանի խոսքով՝ մասնակիցների համար սա նոր հնարավորություն է՝ մասնագետների հետ շփվելու և նրանց հարցեր ուղղելու: Նա նշեց, որ սեմինարի նպատակը երիտասարդ լրագրողների հետ աշխատելն է:
Միջոցառմանն առաջինը դասախոսությամբ հանդես է եկել ֆրանսիացի քաղաքական վերլուծաբան Մայքլ Էրիկ Լամբերտը, ով ներկայացրել է «Լրագրությունը և օբյետիվությունը պատերազմական իրավիճակում» թեման:
Մ. Լամբերտը խոսել է պատերազմական իրավիճակում լրագրողների կատարած աշխատանքի մասին, ընդգծել նրանց ծավալած գործունեության կարևորությունը՝ նման իրավիճակում հասարակությանը խուճապի չմատնելու, միևնույն ժամանակ ճշգրիտ տեղեկատվություն տարածելու ուղղությամբ: Դասախոսության վերջում բանախոսը պատասխանել է նաև լրագրողների հարցերին:
Երկրորդ թեման՝ «ՀՀ զինված ուժերում մարդու իրավունքների պաշտպանության հիմնախնդիրները», ներկայացրել է ՀՀ ՊՆ Մարդու իրավունքների և բարեվարքության կենտրոնի գլխավոր մասնագետ, իրավաբան Սյուզաննա Սողոմոնյանը:
Նա նշել է, որ ՀՀ ՊՆ Մարդու իրավունքների և բարեվարքության կենտրոնում 2017 թվականի հունվարի 11-ից գործում է ՊՆ թեժ գիծը՝ 1-28 անվճար հեռախոսահամարը, որը զինծառայողների ու նրանց ընտանիքների անդամների համար կրկնակի միջոց է՝ իրենց հուզող բոլոր հարցերին ու խնդիրներին պատասխաններ ստանալու:
Սեմինարի առաջին օրվա վերջին բանախոսը ԱՀ Նախագահի անվտանգության հարցերով խորհրդական Տիգրան Աբրահամյանն էր, ով ներկայացրել է «ՊԲ նոր տեղեկատվական կենտրոն. ԶԼՄ-ի աշխատանքն առաջնագծում ապրիլից առաջ և հետո» թեմայով դասախոսություն:
Տ. Աբրահամյանը նշել է, որ այսօր լրագրողների աշխատանքը կազմակերպելու համար և՛ Ստեփանակերտում, և՛ առաջնագծում բարենպաստ պայմաններ են ստեղծվում:
«Տեղում աշխատանքը կազմակերպելու համար վերջերս ձևավորված ՊԲ նոր տեղեկատվական կենտրոնն ունենալու է մամուլի ասուլիսների սրահ և լրագրողների համար համապատասխան սենյակ:
«Տեղեկատվական անվտանգության բաղադրիչը կարևոր դեր է խաղում: Վերջին ժամանակահատվածում այդ գործոնի հետ կապված հարցերը փորձում ենք հանել առաջնային օրակարգ»,- ասել է Տ. Աբրահամյանը:
Սեմինարը շարունակվելու է նաև այսօր և վաղը, որի ընթացքում լրագրողները լինելու են նաև ԱՀ ՊԲ զորամասերից մեկում:
