Մարդկությանն իր քաղաքականությամբ եւ կեցվածքով օգուտ բերող երկիրը՝ «լավ երկիր է», կան երկրներ, որոնք բեռ են մարդկության համար, կան երկրներ, որոնք ցանկում միջին հորիզոնականներն են գրավել:
«Լավ երկրների» ցանկում Հայաստանը 75-րդն է
ՍՏԵՓԱՆԱԿԵՐՏ, 12 դեկտեմբերի, ԱՐՑԱԽՊՐԵՍ: Հայաստանը 163 երկիր ներառող հետազոտության արդյունքում գրավել է 75-րդ տեղը, հաղորդում է «Ազատությունը»:
«Լավ երկիր» (Good Country) տերմինը հեղինակել է East Anglia բրիտանական համալսարանի պատվավոր պրոֆեսոր Սայմոն Անհոլթը, ով անցած երկու տասնամյակների ընթացքում համագործակցել է ավելի քան 50 պետությունների նախագահների ու վարչապետերի հետ, այցելել է բազմաթիվ քաղաքներ, շրջաններ, գավառներ:
Այդ քսան տարիների աշխատանքի արդյունքում ծնվել է «լավ երկրի» ցուցիչ կազմելու գաղափարը: Մարդկության կյանքում առանձին երկրների դերի մասին հինգ գրքերի հեղինակ Անհոլթն իր գործընկերների հետ 2005 թվականից սկսած հաշվարկում է «լավ երկրի» ցուցիչը:
Ընդ որում, ցուցիչը հաշվի չի առնում տվյալ երկրի ներքին քաղաքականությունը, քանի որ վերլուծական կենտրոններն այդ թեմայով ամեն տարի հրապարակում են տասնյակ մանրամասն զեկույցներ:
Ցուցիչը հաշվարկելու համար փորձագետներն օգտագործում են 35 հետազոտությունների տվյալները, դրանց մեծ մասը ՄԱԿ-ն է տրամադրում:
Մասնագետներն այդ տվյալները տեղավորում են ըստ 7 հիմնական բնագավառների՝ գիտություն եւ տեխնոլոգիա, մշակույթ, միջազգային խաղաղություն եւ անվտանգություն, աշխարհակարգ, մոլորակ եւ կլիմա, բարգավաճում եւ հավասարություն, առողջություն եւ բարեկեցություն:
Օրինակ, կրթության եւ տեխնոլոգիայի բնագավառում հաշվի են առնում տվյալ պետությունում սովորող օտարերկրացի ուսանողների, դրսից ստացվող գիտական հանդեսների, արտասահմանյան պարբերականներում այդ երկրի գիտնականների հրապարակած հոդվածների եւ, վերջապես, այդ երկրից Նոբելյան մրցանակակիրների թիվը:
Խաղաղության բնագավառում հաշվի են առնում այդ երկրից միջազգային մանդատով թեժ գոտիներում ծառայող խաղաղապահների թիվը:
Մշակույթի բնագավառում հաշվի են առնում համագործակցությունը UNESCO-ի հետ, այդ երկրից արտահանվող հեղինակային ծրագրերը եւ ծառայությունները, մամուլի ազատության մակարդակը:
Ցուցիչի նպատակն է նախաձեռնել քննարկում, որի թեման առանձին երկրների պիտանելիությունն է համայն աշխարհի տեսակետից: Հաշվի են առնվում բազմաթիվ կարեւոր այլ գործոններ, այդ թվում՝ տվյալ երկրում բարեգործության մշակույթը եւ բնության պաշտպանությունը:
Ահա Հայաստանի տվյալները՝ գիտություն եւ տեխնիկա՝ 56-րդ տեղ, միջազգային խաղաղություն եւ անվտանգություն՝ 136, աշխարհակարգ՝ 104, մոլորակ եւ կլիմա՝ 108, բարգավաճում եւ հավասարություն 48, մշակույթ՝ 103, առողջություն եւ բարեկեցություն՝ 31:
Այդ ամենի արդյունքում Հայաստանն ընդհանուր հաշվով դարձել է մոլորակի 75-րդ «լավ երկիրը»՝ բավական զիջելով Ուկրաինային, Վրաստանին եւ Ռուսաստանին, սակայն առաջ անցնելով Ադրբեջանից, որը 89-րդ տեղում է:
Մոլորալի «ամենալավ» երկրներն են Հոլանդիան, Շվեյցարիան եւ Դանիան: Իսկ 163 երկրներից վերջին երեք տեղերում են Իրաքը, Լիբիան եւ Աֆղանստանը:
