Ընթացիկ տարում Արցախի Հանրապետության ֆինանսների նախարարությունը սկսելու է հարկային օրենսգրքի մշակումը, որն իրականացվելու է հասարակության լայն շերտերի հետ քննարկումներից հետո:
Ընթացիկ տարում կսկսվի հարկային օրենսգրքի մշակումը
ՍՏԵՓԱՆԱԿԵՐՏ, 15 հունվարի, ԱՐՑԱԽՊՐԵՍ: Այս մասին լրագրողների հետ հանդիպման ժամանակ ասել է ԱՀ ֆինանսների նախարար Գրիգորի Մարտիրոսյանը:
Նրա խոսքով՝ այդ օրենսգիրքը պետք է քննարկվի գործարար տարբեր միությունների, հարկատուների առանձին խմբերի հետ: «Մեր նպատակն է հարկային ոլորտում վստահության մթնոլորտի ձևավորումը: Հասարակության լայն շերտերի ներգրավմամբ հարկային օրենսգրքի մշակումը կարևոր ներդրում է լինելու տնտեսության ակտիվացման, գործարար միջավայրի հետագա բարելավման ու օտարերկրյա ներդրումների ներգրավման գործում, ինչի արդյունքում հնարավոր կլինի ապահովել երկարաժամկետ և կայուն տնտեսական աճ»,- նշել է Գ. Մարտիրոսյանը և ավելացրել, որ այն նաև գործարարների համար ապահովելու է կայուն և կանխատեսելի հարկային համակարգ:
ԱՀ ֆինանսների նախարարի խոսքով՝ 2018 թվականից կիրականացվեն հարկային նոր բարեփոխումներ, ինչպես օրենսդրական դաշտում, այնպես էլ հարկային վարչարարության մեխանիզմների կատարելագործման նպատակով: Այդ բարեփոխումների նոր փուլը պայմանավորված է ԱՀ նախագահի 2017-2020 թթ. ծրագրով նախատեսված բարեփոխումների ընթացքի հետ:
ԱՀ ֆինանսների նախարարը նշել է, որ բարեփոխումները կիրականացվեն 4 հիմնական ուղղություններով՝ գործարար միջավայրի բարելավում, հսկողական աշխատանքների և մեխանիզմների կատարելագործում, հարկատու-հարկային մարմին փոխհարաբերման դաշտի բարելավում և հարկային մարմնի էլեկտրոնային կառավարման համակարգի կատարելագործում:
Նրա խոսքով՝ առաջիկա տարիներին խորացվելու է նաև համագործակցությունը հասարակության հետ՝ նրանց ներգրավելով իրականացվող հարկային բարեփոխումների գործընթացներում, այդ թվում՝ պարբերաբար հանդիպումներ, կարծիքների փոխանակումներ կկազմակերպվեն քաղաքացիական հասարակության ինստիտուտների, տնտեսության տարբեր ոլորտների մասնագետների, ինչպես նաև ուսանողության հետ, ինչը կամրապնդի հարկերի ինքնուրույն հաշվարկման և վճարման մշակույթը:
