«Արցախի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքով սահմանված դրոշմանիշային վճարների հավաքագրման նպատակով Կենտրոնական գանձապետարանում բացվել է 915005000020 «Դրոշմանիշային վճարներ» հաշվեհամար:
1000 դրամի պարտադիր հանգանակության համար Կենտրոնական գանձապետարանում հաշվեհամար է բացվել
ՍՏԵՓԱՆԱԿԵՐՏ, 23 հունվարի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում ԱՀ ֆինանսների նախարարության հարկային վարչարարության մեթոդաբանության և հարկ վճարողների իրազեկման բաժնի պետ Արմինե Մուսայելյանն ասել է, որ սկսած 2018 թվականի հունվարի 1-ից գործատուները յուրաքանչյուր ամիս մինչև հաջորդ ամսվա 20-ը, նշված հաշվեհամարին պետք է փոխանցեն իրենց մոտ աշխատանքային պայմանագրերով վարձու աշխատողների և քաղաքացիաիրավական պայմանագրերով աշխատանքներ կատարող կամ ծառայություններ մատուցող յուրաքանչյուր քաղաքացու հաշվով 1000-ական դրամ, իսկ անհատ ձեռնարկատերերը յուրաքանչյուր տարվա արդյունքներով` մինչև հաջորդող տարվա մայիսի 1-ը` 12000 դրամ:
«Դրոշմանիշային վճարը` զինծառայողների կյանքին և առողջությանը պատճառված վնասների հատուցումն ապահովելու նպատակով օրենքով սահմանված կարգով և չափով Արցախի Հանրապետության պետական բյուջե վճարվող պարտադիր վճար է: Այն պարտավոր են վճարել աշխատանքային պայմանագրով աշխատող վարձու աշխատողները, քաղաքացիաիրավական պայմանագրերով ծառայություններ մատուցող կամ աշխատանքներ կատարող ֆիզիկական անձինք և անհատ ձեռնարկատերերը»,- նշել է Ա. Մուսայելյանը և ավելացրել, որ եթե վարձու աշխատողի աշխատավարձը, եկամտային հարկը և դրոշմանիշային վճարը նվազեցնելուց հետո չի գերազանցում օրենսդրությամբ սահմանված նվազագույն ամսական աշխատավարձի չափը, ապա վարձու աշխատողի փոխարեն դրոշմանիշային վճարը վճարվում է ԱՀ պետական մարմիններում աշխատող անձանց փոխարեն ԱՀ պետական բյուջեից, տեղական ինքնակառավարման մարմիններում աշխատող անձանց փոխարեն` համապատասխան համայնքի բյուջեից, այլ գործատուների մոտ աշխատող անձանց փոխարեն` տվյալ անձանց աշխատավարձ վճարող գործատուի կողմից` նրա միջոցների հաշվին, ընդ որում, եթե վարձու աշխատողն աշխատում է ոչ լրիվ աշխատաժամանակի ռեժիմով, ապա որպես օրենսդրությամբ սահմանված նվազագույն աշխատավարձի չափ է ընդունվում տվյալ աշխատաժամանակին համապատասխանող չափը:
Նշենք, որ ընթացիկ տարվա հունվարի 1-ից Արցախում ուժի մեջ է մտել «Արցախի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքով նախատեսված 1000 դրամի պարտադիր հանգանակությունը:
