Ադրբեջանի պաշտպանության նախարարությունը, փորձելով արդարացնել ագրեսիվ գործողությունները, վերջնականապես խճճվել է իր «փաստարկներում»
Ադրբեջանի պաշտպանության նախարարությունը խճճվում է իր «փաստարկների» մեջ
ՍՏԵՓԱՆԱԿԵՐՏ, 19 ՆՈՅԵՄԲԵՐԻ, ԱՐՑԱԽՊՐԵՍ: Վերոնշյալ նպատակը հետապնդելով՝ հարեւան երկրի ռազմական գերատեսչությունը կայքում տեղադրել է «այս իրադարձության ինֆոգրաֆիկան»: Այն դիտելը տեխնիկական պատճառներով հնարավոր չէ, սակայն ադրբեջանական լրատվամիջոցների օգնությամբ կարելի է ծանոթանալ տեքստի հետ:
«Ինֆոգրաֆիկայում ասվում է, որ դեպքի վայրում արված գնահատականներն ու դիտարկումները, հետախուզական տվյալների ուսումնասիրությունն ու ավիացիոն մասնագետների եզրակացությունները թույլ են տալիս եզրահանգել, որ ուղղաթիռներն իրականացրել են մարտական թռիչք եւ իրականացրել են ադրբեջանական դիրքերի գնդակոծության մասին հրաման: Այս առաջադրանքը կատարելուց, այսինքն՝ մեր դիրքերը գնդակոծելուց հետո, թշնամական ուղղաթիռները, մանեւրելով եւ մեկը մյուսին ծածկելով, պետք է լքեին գնդակոծության գոտին, - ասվում է հաղորդագրության մեջ: «Եզրակացության մեջ նշվում է, որ Ադրբեջանի օկուպացված տարածքներով թռիչքները դիտարկվում են՝ որպես երկրի օդային տարածքի խախտում, եւ հենց այդ պատճառով «մեր դիրքերի ուղղությամբ կրակ բացած հայկական ուղղաթիռը խոցվել է»: Ըստ կայքում տեղադրված ինֆոգրաֆիկայի՝ ուղղաթիռը խոցվել է ուղիղ ադրբեջանական բանակի դիրքերի վերեւում: Մի փոքր թռչելով՝ այն ընկել է ադրբեջանական դիրքերից 100 մ., եւ հայկական դիրքերից՝ 300 մետր հեռավորության վրա: Ընդ որում «Իգլա-Ս» շարժական զենիթահրթիռային համալիրից կրակը բաց է թողնվել պաշտպանական երկրորդ գծից՝ 2140 մետր բարձրությունից:
Այսպիսով, ի՞նչ էին անում հայկական ուղղաթիռները: Ադրբեջանական ռազմական գերատեսչության սկզբնական հաղորդագրությունները բարբառում էին «կրակ բացելու մտադրության», բայց ոչ իրականացման մասին: Ուղիղ 5 օր մտածելուց հետո Ադրբեջանի ղեկավարությունը որոշեց, որ «գնդակոծել» փաստարկն ավելի համոզիչ է հնչում, քան «մտադրվելը»:
Ուստի ինչո՞ւ խոցվեց ինքնաթիռը: Այստեղ եւս տրամաբանություն չկա: Հարեւան պետության տարբեր տրամաչափի ներկայացուցիչներ փրփուրները բերանին հայտարարում էին «դիրքերի գնդակոծության» եւ իսկույն անցնում «օդային տարածքի խախտմանը»: Այսինքն ակնհայտ է ուղիղ խոստովանություն, որ ոչ մի «գնդակոծություն» գոյություն չի ունեցել:
Որտե՞ղ է ընկել ուղղաիթռը: Եթե փորձենք իրավիճակը դիտել ադրբեջանական կողմի դիրքերից, ստացվում է, որ ուղղաթիռի բեկորները անմիջականորեն ընկած են իրենց դիրքերի մերձակայում: Սակայն տարօրինակ է, որ ադրբեջանական կողմը չի փորձում աշխարհին ցուցադրել «ճշմարտությունը»՝ հրավիրելով ռազմական կցորդներին, միջազգային կազմակերպությունների ներկայացուցիչներին եւ այլն: Հակառակը, Ադրբեջանի իշխանությունները բոլոր հնարավոր ջանքերը գործադրել են, որպեսզի ԵԱՀԿ-ի ներկայացուցիչներին թույլ չտան այցելել ուղղաթիռի խոցման վայր: Հրաժարվելով անվտանգության երաշխիքներ տրամադրել՝ Ադրբեջանի Հանրապետության իշխանությունները ԵԱՀԿ-ին տառացիորեն ստիպեցին դիտարկումն իրականացնել այլ ուղղությամբ: Ճիշտ է, ոչ ոք չի արգելում միջազգային կազմակերպություններին այցելել ողբերգության վայր՝ դրա մասին չհայտնելով ադրբեջանական կողմին:
Եվ վերջապես. Ադրբեջանն արդեն 5 օր շարունակ Ժնեւի կոնվենցիայի իրականացման մասով բոլոր պարտավորությունների կոպիտ խախտում է ցուցադրում ՝ թույլ չտալով պարզել խոցված ուղղաթիռի անձնակազմի ճակատագիրը:
