Մարտի 15-ին, ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանը հանդիպել է պաշտոնական այցով Ստեփանակերտ ժամանած ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Ամալյա Եղոյանի և «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանի հետ՝ քննարկելու տեղեկատվական տեխնոլոգիաների ոլորտի հետագա զարգացումն Արցախում:
Արցախում «ԱՅ-ԹԻ» ոլորտի զարգացման ծրագրերը նոր ընթացք կստանան
ՍՏԵՓԱՆԱԿԵՐՏ, մարտի 16, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ հանդիպմանն ԱՀ էկոնոմիկայի և արտադրական ենթակառուցվածքների նախարարը, ողջունելով հյուրերին ասել է, որ անցած տարվա դեկտեմբերին իր գլխավորած պատվիրակության՝ ՀՀ կատարած այցի ընթացքում ձեռք բերված պայմանավորվածությունները ծրագրային առումով ընդհանուր տեսքի են բերվել:
«Պետք է նախանշել այն աշխատանքները, որոնք ի կատար են ածվելու առաջիկա ամիսներին: Ունենք առանձին ծրագրեր, սակայն ժամանակն է դրանք վերածելու ընդհանուր մոդելի»,- մասնավորապես նշել է Լ. Գրիգորյանը:
ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Ամալյա Եղոյանն էլ ասել է, որ Արցախում 2009 թվականից տեխնոլոգիական տարաբնույթ ծրագրեր են իրականացվում՝ այդ թվում՝ շփում երիտասարդների, ինչպես նաև դպրոցներում դասավանդող ինֆորմատիկայի ուսուցիչների հետ:
«Այսօր ուրախալի է, որ նախարարության կողմից կա նախաձեռնություն՝ հզորացնելու և զարգացնելու ոլորտը՝ Հայաստանի փորձը բերելով Արցախ, այն է կրթություն-բիզնես կապի շնորհիվ նպաստել աշխատատեղերի ստեղծմանը, և նոր հնարավորությունների ուղղորդմանը: «ԱՅ-ԹԻ» ոլորտն Արցախ է ներթափանցել դեռևս 2009 թ.-ից, երբ ոչ միայն Ստեփանակերտում, այլև Մարտակերտում, Մարտունիում, Ասկերանում իրականացվել է ուսուցիչների վերապատրաստում ինֆորմատիկա առարկայից: Ծրագիրն իրականացվել էր «Հայ կրթական հիմնարկության» հետ համատեղ: Արցախում անհրաժեշտ պոտենցիալ կա, և եթե համարենք, որ տեղեկատվական տեխնոլոգիաների ոլորտում հիմնական ուժեղ կողմը մեր երիտասարդների տաղանդն է, ապա արդեն իսկ աշխարհագրական դիրքը և հեռավորությունը խոչընդոտ լինել չեն կարող: Նույն այն լուծումները, որոնք արվում են Երևանում և Հայաստանի մյուս քաղաքներում, կարող են իրականացվել նաև Արցախում»,- մասնավորապես նշել է Ա. Եղոյանը:
«Ձեռնարկությունների ինկուբատոր» հիմնադրամի տնօրեն Բագրատ Ենգիբարյանն էլ ասել է, որ եթե 2-3 տարի առաջ Արցախում շատ քչերն էին հավատում, որ ինֆորմացիոն տեխնոլոգիաները կարող են դառնալ իրականություն, ապա այսօր կարող ենք փաստել, որ առաջին քայլերը հաջողությամբ են իրականանում:
«Ունենք արտասահմանյան կապիտալով ստեղծված կազմակերպություններ, որտեղ աշխատում են 30-ից ավել մասնագետներ, և դա ոգևորում է ոչ միայն կառավարությանը, այլև երիտասարդ սերնդին: Պետք է նայել առաջ և օգտվել այն համաշխարհային մարտահրավերներից, որոնք ներկայումս կան: Դա նոր տեխնոլոգիական զարգացումն է՝ արհեստական ինտելեկտը, մեքենայական ուսուցումը, որտեղ մաթեմատիկական, ֆիզիկական ծրագրավորման գիտելիքներն առաջնային են, և սա բացառիկ հնարավորություն է Հայաստանի և Արցախի Հանրապետությունների համար զբաղվելու այս ուղղություններով՝ զարկ տալով կրթության զարգացմանը և երկիր բերել նոր տեխնոլոգիական կազմակերպություններ:
Այդ առումով շատ կարևոր է առաջին հերթին դաշտը պատրաստել, ստեղծել համապատասխան հարկային արտոնություններ՝ տեղական և արտասահմանյան կազմակերպությունների համար և կրթական՝ հատկապես բուհական ոլորտում, որոշակի քայյլեր կատարել մասնագետների և դասախոսների վերապատրաստման նոր ուսումնական ծրագրերի ներդրման առումով: Կարծում եմ՝ այս առումով մենք համատեղ մեծ աշխատանք ունենք անելու»,- նշել է Բ. Ենգիբարյանը:
Հանդիպումից հետո ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Ամալյա Եղոյանը և «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանն ԱՀ էկոնոմիկայի և արտադրական ենթակառուցվածքների նախարարության աշխատակիցների հետ այցելել են Արցախի տեղեկատվական տեխնոլոգիաների կենտրոն՝ տեղում ծանոթանալով երեխաների ուսուցմանը: Հյուրերը հանդիպել են նաև Արցախի տեղեկատվական տեխնոլոգիաների կենտրոնի տնօրեն Նարինե Ասծատրյանի հետ՝ խոսել առաջիկա ծրագրերի և հետագա համագործակցությունը շարունակելու մասին:
