Իտալական հեղինակավոր La Stampa պարբերականն անդրադարձել է Վատիկանում Գրիգոր Նարեկացու 2 մետրանոց բրոնզե արձանի բացմանը, որը տեղի կունենա ապրիլի 5-ին:
Վատիկանում Նարեկացու արձանի տեղադրումը սպասված իրադարձություն է. La Stampa-ի անդրադարձը
ՍՏԵՓԱՆԱԿԵՐՏ, մարտի 29, ԱՐՑԱԽՊՐԵՍ-ԱՐՄԵՆՊՐԵՍ: Պարբերականը գրում է, որ արձանի բացման արարողությանը ներկա է լինելու կաթոլիկ աշխարհի հոգևոր առաջնորդ Հռոմի Ֆրանցիսկոս պապը:
La Stampa-ն նշում է, որ բացմանը մասնակցելու նպատակով Վատիկան կժամանի Հայաստանի Հանրապետության Նախագահ Սերժ Սարգսյանը, ով այդ օրն առավոտյան ընդունելության կարժանանա Հռոմի պապի կողմից: Ավելի ուշ, կաթոլիկ աշխարհի հոգևոր առաջնորդը կընդունի նաև Ն.Ս.Օ.Տ.Տ. Ամենայն Հայոց Գարեգին Բ կաթողիկոսին և Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսին:
Լրատվամիջոցն ընդգծում է, որ Վատիկանի սրտում Սուրբ Գրիգոր Նարեկացու արձանի տեղադրումը Նախագահ Սարգսյանի ցանկությունն էր, որի մասին նա բարձրաձայնել էր 2016 թվականի հունիսին, երբ Ֆրանցիսկոս պապը ժամանել էր Հայաստան՝ «առաջին քրիստոնյա երկիր»: Այցի ժամանակ Հայաստանի ղեկավարը Հռոմի պապին էր նվիրել Նարեկացու արձանի մանրակերտը՝ ի նշան երախտագիտության այն բանի, որ 2015 թվականին Գրիգոր Նարեկացուն շնորհվել էր Տիեզերական եկեղեցու վարդապետի կոչում:
La Stampa-ն գրել է նաև, որ ինչպես ֆեյսբուքյան իր էջում հայտնում է Վատիկանում ՀՀ դեսպան Միքայել Մինասյանը՝ տեղադրվելիք արձանի հեղինակը նույն ճարտարապետն է, ով հեղինակել էր Պապին նվիրված մանրակերտը:
Նարեկացու արձանի հեղինակը Դավիթ Երևանցին է:
