Ն.Ս.Օ.Տ.Տ. Բարեգին Բ Ամենայն հայոց կաթողիկոսն ուղերձ է հղել ապրիլի 24-ի՝ հայոց ցեղասպանության սուրբ նահատակների հիշատակի օրվա առիթով։
Գարեգին Բ. Մեր ժողովրդի համար նվիրական այս օրը լինել առավել սիրով ու համերաշխ
ՍՏԵՓԱՆԱԿԵՐՏ, ապրիլի 23, ԱՐՑԱԽՊՐԵՍ: «Վաղը հիշատակի օրն է Հայոց ցեղասպանության մեր սուրբ նահատակների: Ազգովի վերստին մեր խոնարհումը պիտի բերենք Հայոց ցեղասպանության սուրբ նահատակներին, ովքեր իրենց կյանքն ընծայեցին հանուն հավատքի եւ հայրենիքի:
Ապրիլի 24-ը յուրաքանչյուրիս համար սրբազան օր է, նվիրագործված օր, երբ Ծիծեռնակաբերդի բարձունքում, եկեղեցիներում եւ Հայոց ցեղասպանության հուշակոթողների առջեւ համազգային համախմբվածությամբ հարգանքի տուրք ենք մատուցում մեր սուրբ նահատակներին:
Սիրելի հայորդիներ, Մեր հորդորն ենք բերում ձեզ՝ մեր ժողովրդի համար նվիրական այս օրը լինել առավել սիրով ու համերաշխ, ամենուր միաբան ու միասիրտ աղոթք բարձրացնել եւ հայցել մեր սուրբ նահատակների բարեխոսությունը առ Աստված՝ առաջնորդելու մեր կյանքը խաղաղության, ապահովության եւ առաջընթացի ճանապարհներով:
Թող մեր Տեր Հիսուս Քրիստոսի սերը, ողորմությունն ու շնորհները լինեն մեզ բոլորիս հետ. Ամեն»,- ասել է կաթողիկոսը:
