Մայիսի 1-ն ապրիլյան պատերազմի մասնակից, «Մարտական խաչ» 1-ին աստիճանի շքանշանակիր Անդրանիկ Զոհրաբյանի ծննդյան օրն է. այսօր նա կդառնար 22 տարեկան:
Ապրիլյան պատերազմի մասնակից Անդրանիկ Զոհրաբյանն այսօր կդառնար 22 տարեկան
ՍՏԵՓԱՆԱԿԵՐՏ, մայիսի 1, ԱՐՑԱԽՊՐԵՍ: Անդրանիկ Զոհրաբյանը ծնվել է 1996 թվականի մայիսի 1-ին ՀՀ Վեդի քաղաքում: Նա սովորել է Եվրոպական քոլեջի Վեդու մասնաճյուղում` հաշվապահական հաշվառում և աուդիտ բաժնում: Սիրում էր ֆուտբոլ ու շատ լավ էր խաղում. երազում էր դառնալ ֆուտբոլի մարզիչ: Ուներ երկու քույր: Ընտանիքի միակ որդին` Անդրանիկը, 2014 թվականի հուլիսին մեկնել է ծառայության: Նա ծառայում էր Արցախի Մարտակերտի շրջանում։ Ա. Զոհրաբյանը կռվել է կապիտան Արմենակ Ուրֆանյանի հրամանատարությամբ: 2016 թվականի ապրիլի 2-ին հակառակորդի հարձակումների ժամանակ զոհվել է Անդրանիկը:
Նշենք, որ Անդրանիկ Զոհրաբյանը Հայաստանի նախագահի հրամանագրով հետմահու պարգևատրվել է զինվորական բարձրագույն պարգևով՝ «Մարտական խաչ» առաջին աստիճանի շքանշանով, իսկ Արցախի հանրապետության նախագահ Բակո Սահակյանի հրամանագրով՝ «Մարտական ծառայության» մեդալով։