ԱՀ կրթության, գիտության և սպորտի նախարարության նախաձեռնությամբ այսօր Ստեփանակերտի Խաչատուր Աբովյանի անվան N 1 հիմնական դպրոցում կայացել է ԱՀ «Լավագույն մարզական նախադպրոցական հաստատություն» մրցույթի հանրապետական փուլը:
Ստեփանակերտում կայացել է «Լավագույն մարզական նախադպրոցական հաստատություն» մրցույթի հանրապետական փուլը
ՍՏԵՓԱՆԱԿԵՐՏ, մայիսի 4, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ ԿԳՍ նախարարության սպորտի զարգացման և մարզական հերթափոխի համակարգման բաժնի վարիչ,մրցույթի գլխավոր մրցավար Լևոն Գասպարյանն ասել է, որ մրցումներին մասնակցում են Ստեփանակերտի, Մարտունու, Մարտակերտի, Ասկերանի, Հադրութի նախադպրոցական հաստատությունների շուրջ 60 երեխա:
Նրա խոսքով՝ մրցույթի նպատակն է ի հայտ բերել, թե որ նախադպրոցական հաստատության երեխաների մոտ է անհատի բազմակողմանի և ներդաշնակ զարգացումն ավելի բարձր հիմքերի վրա դրված, ինչպես նաև՝ նախադպրոցական տարիքի երեխաների ֆիզիկական դաստիարակության, առողջության ամրապնդման, նրանց ֆիզիկական որակների բարելավման ուղղությամբ ինչպիսի աշխատանքներ են տարվել:
Մրցույթն անց է կացվում 5 մարզաձից՝ փոխանցումավազք արգելքների հաղթահարումով, խաղային փոխանցումավազք, անցում աթլետիկական արգելքների միջով, վարժություն մանկական եռանիվ հեծանիվով և օղակների հավաքում:
Մեր զրուցակցի խոսքով՝ մրցանակային 1-3-րդ տեղեր գրաված թիմերն արժանանալու են «Լավագույն մարզական նախադպրոցական հաստատություն» մրցույթի համար նախատեսված գավաթների և պարգևատրվելու են դիպլոմներով և նվերներով:
Լ. Գասպարյանը տեղեկացրել է նաև, որ մրցանակային առաջին տեղ գրաված թիմն էլ մասնակցելու է Երևանում կայանալիք «Լավագույն մարզական նախադպրոցական հաստատություն» մրցույթի եզրափակիչ փուլին:
