ՀՀ կրթության և գիտության նախարարության գիտության պետական կոմիտեյի ֆինանսական աջակցության շնորհիվ 2011-2017 թվականներին Արցախի գիտական կենտրոնի մանրէաբանության լաբորատորիայի գիտաշխատողներն ուսումնասիրել են Արցախի տարբեր շրջանների կաթնաթթվային բակտերիանների կենսաբազմազանությունը:
Արցախում արտադրվում է «Արցախլակտ» պրոբիոտիկ կաթնաթթվային նոր մթերք
ՍՏԵՓԱՆԱԿԵՐՏ, մայիսի 30, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Արցախի գիտական կենտրոնի մանրէաբանության լաբորատորիայի պատասխանատու, գիտաշխատող Արևիկ Իսրայելյանը:
Նրա խոսքով՝ ներկայումս Արցախի գիտական կենտրոնի մանրէաբանության լաբորատորիայում պահվում է ավելի քան 200 կաթնաթթվային բակտերիա, ստեղծվել է կաթնաթթվային մանրէների գենոֆոնդ, ընտրված են պրոբիոտիկ հատկություններով օժտված էնդեմիկ մանրէներ, որոնք հիմք կարող են հանդիսանալ ֆունկցիոնալ սննդի արտադրության, բժշկության և անասնաբուժության համար:
«Հայտնի է, որ Արցախում և Հայաստանում կաթնամթերքի արտադրությունում հիմնականում օգտագործվում է արտասահմանյան հայտնի ֆիրմաների մերան: Կարծում ենք՝ հարկ է օգտագործել մեր տեղական էնդեմիկ մանրէները, քանի որ վաղուց ի վեր հայտնի է, որ յուրաքանչյուր տարածաշրջանի և, բնականաբար, նաև մեր օրգանիզմին բնորոշ է տեղի մանրէների կենսաբազմազանությունը: Օգտագործելով ներկրված մերան՝ կարող է խնդիր առաջանալ էնդեմիկ մանրէների անհետացման գործում: Հաշվի առնելով այս ամենը՝ սկսեցինք զբաղվել «Արցախլակտ» անվանումը ստացած պրոբիոտիկ կաթնաթթվային մթերքը»,-պարզաբանել է Ա. Իսրայելյանը:
«Արցախլակտ» պրոբիոտիկ կաթնաթթվային մթերքի սերիական արտադրության գաղափարը պատկանում է ՀՀ գիտությունների ազգային ակադեմիայի «Հայկենսատեխնոլոգիա» գիտարտադրական կենտրոնի սննդի կենսաանվտանգության լաբորատորիայի առաջատար գիտաշխատող, կենսաբանական գիտությունների թեկնածու Ֆլորա Տխրունուն և Արցախի գիտական կենտրոնի մանրէաբանական լաբորատորիայի գիտաշխատողներ Արևիկ Իսրայելյանին և Լիլյա Առստամյանին:
Թե ի՞նչ է իրենից ներկայացնում «Արցախլակտ»-ը մեր զրուցակիցը պատասխանել է, որ այն Արցախի Հանրապետության էնդեմիկ, պրոբիոտիկ կաթնաթթվային մանրէների (Enterococcus durans և Lactobacillus acidophilus) մաքուր կուլտուրաներով բնական պաստերիզացված կովի կաթի խմորման ճանապարհով ստացված ֆունկցիոնալ սննդամթերք է:Այն ունի նուրբ կաթնաթթվային համ ու հոտ, կաթնասպիտակավուն գույն: Շնորհիվ կենսաբանական բարձր առանձնահատկությունների՝ կաթնամթերքը կիրառվում է որպես պրոբիոտիկ. այն նախատեսված է ամենօրյա օգտագործման համար:
Ա. Իսրայելյանն ավելացրել է, որ «Արցախլակտ»-ը կարևոր դեր է խաղում աղիքային միկրոֆլորայի կարգավորման գործում: Կաթնամթերքում պարունակվող կաթնաթթվային բակտերիաներն օժտված են հակաօքսիդանտային, ադհեզիվ հատկությամբ և հակամանրէային բարձր ակտիվությամբ՝ լայն սպեկտրի ախտածին և պայմանական ախտածին միկրոֆլորայի ներկայացուցիչների նկատմամբ. այն վերականգնում է աղիների նորմալ միկրոֆլորան:
Ա. Իսրայելյանը տեղեկացրել է նաև, որ արտադրանքը շուտով հասանելի կլինի Արցախի սպառողներին:
