Ստեփանակերտի մշակույթի և երիտասարդության պալատում կայացել է մայրաքաղաքի մանկապատանեկան ստեղծագործական կենտրոնի (ՄՊՍԿ) սաների 2017-2018 ուսումնական տարվա հաշվետու համերգը:
Ստեփանակերտի մանկապատանեկան ստեղծագործական կենտրոնի սաները հանդես են եկել հաշվետու համերգով (լուսանկարներ)
ՍՏԵՓԱՆԱԿԵՐՏ, հունիսի 8, ԱՐՑԱԽՊՐԵՍ: Համերգին կենտրոնի սաները կատարել են հայրենասիրական և արտասահմանյան երգեր, պարել ազգագրական պարեր, հանդես եկել ասմունքով:
«Արցախպրես»-ի թղթակցի հետ զրույցում Ստեփանակերտի մանկապատանեկան ստեղծագործական կենտրոնի տնօրեն Վիլեն Միքայելյանն ասել է, որ կենտրոնը ստեղծվել է 1993 թվականին՝ արցախյան շարժման ամենաթեժ ժամանակահատվածում: Մինչև 2010 թվականը կենտրոնը հաղթահարել է մի շարք դժվարություններ, աշխատանքներն ընթանում էին անբարենպաստ պայմաններում:
Իսկ 2010 թվականին արդեն շահագործման է հանձնվել միջազգային չափանիշներին համապատասխան կենտրոն, որտեղ երեխաներն սովորում են անվճար հիմունքներով:
Նրա խոսքով՝ կենտրոնում գործում է ավելի քան 30 խմբակ, այդ թվում պարարվեստի, երգարվեստի, ժողգործիքների, նկարչական, ձեռքի աշխատանքների, կավագործության, ասեղնագործության և այլն: Ներկայումս կենտրոն է հաճախում շուրջ 1400 երեխա.այն տարեցտարի ավելանում է:
«Կենտրոնի սաներն ակտիվորեն մասնակցում են տարբեր միջազգային մրցույթների և գրավում առաջնակարգ տեղեր: Վերջերս նրանք մասնակցել են Երևանում կայացած «Նոր շունչ-2018» համահայկական միջազգային պարային մրցույթի, որտեղ ստացել են ամնեբարձր միավորները: Օրերս նաև նկարչական խմբի սաները մասնակցել են Երևանում կայացած Սիլվա Կապուտիկյանի 100-ամյակին նվիրված՝ «Ծաղկանոց» գրքի շնորհանդեսի համար հայտարարված մրցույթին և գրավել 4 առաջին և 2 երկրորդ մրցանակային տեղեր»,-մասնավորապես ասել է կենտրոնի տնօրենը:
Մեր զրուցակիցը տեղեկացրել է նաև, որ կենտրոն հաճախելով երեխաներն դառնում են ավելի ընկերասեր, աշխատասեր, նպատակասլաց և նրանց մոտ ձևավորվում է գեղագիտական ճաշակ. երեխաները ստանում են ազգային արհեստի և արվեստի վերաբերյալ ավելի խորը գիտելիքներ:
Միջոցառմանը ներկա էին ԱՀ մշակույթի, երիտասարդության հարցերի և զբոսաշրջության նախարար Սերգեյ Շահվերդյանը, ԱՀ արտաքին գործերի նախարար Մասիս Մայիլյանը, Ստեփանակերտի քաղաքապետ Սուրեն Գրիգորյանը, ԱՀ ԱԺ պատգամավորներ, կենտրոն հաճախող սաների ծնողներ և այլք:
