ՍՏԵՓԱՆԱԿԵՐՏ, հունիսի 27, ԱՐՑԱԽՊՐԵՍ: Սրբ Գևորգ եկեղեցու օծման արարողությունը կատարվել է Արցախի թեմի առաջնորդ Պարգև արքեպիսկոպոս Մարտիրոսյանի ձեռամբ:

Որից հետո եկեղեցում Արցախի թեմի փոխառաջնորդ Սահակ վարդապետ Շաքարյանի հանդիսապետությամբ էլ մատուցվել  է պատարագ:

Եկեղեցու   բացման արարողությանը Ճանկաթաղի դպրոցի աշակերտները Սարգսյանների ընտանիքին նվիրված մեծարման փոքրիկ միջոցառում են կազմակերպել:

 «Արցախպրես»-ի թղթակցի հետ զրույցում Սուրբ Գևորգ եկեղեցու ինժեներ-կոնստրուկտոր Վալերի Հայրապետյանն ասել է, որ սրբավայրը կառուցված է եղել 17-րդ դարում՝ 1609 թվականին: Ժամանակի ընթացքում պայթեցվել է եկեղեցին. պահպանվել էր միայն եկեղեցու հյուսիսային պատը  և  ձախակողմյան ավանդատունը:

 

«2011 թվականին սկսկել ենք եկեղեցու վերակառուցման աշխատանքները, որն ավարտին ենք հասցրել մի քանի օր առաջ: Եկեղեցու համար օգտագործել ենք Մարտակերտի շրջանի կոպտատաշ քարերը, իսկ խաչքարերը կառուցվել են եկեղեցու տեղանքում եղած հին գերեզմանաքարերից: Եկեղեցու տարածքի բարեկարգման աշխատանքներին ներգրավված էին նաև համագյուղացիները: Վերակառուցման ժամանակ հնարավորինս փորձել ենք պահպանել եկեղեցու ճարտարապետական հին տեսքը»,-ավելացրել է Վ. Հայրապետյանը:

Տամելա Սարգսյանն ասել է, որ հայրենի Ճանկաթաղ գյուղի Սրբ Գևորգ եկեղեցու վերակառուցման մտահղացումն իր ամուսնու՝ էդուարդ Սարգսյանինն է եղել, ով ցավոք, մի քանի ամիս առաջ է մահացել:

Նրա խոսքով՝ իր ամուսինը նախաձեռնելով այս հայրենանվեր գործը, և իր արդար վաստակը ներդնելով եկեղեցու կառուցմանը միշտ ուզում էր ժամ առաջ այն ավարտած տեսնել:

«Այսօր՝ հունիսի 27-ին, Էդուարդի ծննդյան 55-ամյակն է,  և  մենք որոշեցինք այս հիշարժան օրն իրականացնել իր ամենասպասված երազանքը: Անշուշտ, անհունում սավառնող նրա ոգին ներկա է եկեղեցու բացման արարողությանը: Մենք պիտի շարունակենք նրա կիսատ մնացած բոլոր ծրագրերն ու երազնաքները»,-մասնավորապես ասել է Տ. Սարգսյանը:

Նա  նշել  է, որ  ցանկանում  է   Ճանկաթաղի եկեղեցու ճանապարհը միշտ բանուկ լինի:

Իսկ Էդուարդ Սարգսյանի դուստրը՝ Էդիտան էլ ասել է, որ իր հայրիկի հայրենանվեր նախաձեռնությունը ոգեշնչող  է: Նրա  խոսքով՝    իրենք   ևս պատրաստ են   արժանին մատուցելու  հայ    ժողովրդին:

Ճանկաթաղի համայնքի ղեկավարի պաշտոնակատար Սասուն Վանյանն      ասել է, որ  եկեղեցին լավ նվեր է հավատի տուն չունեցող ճանկաթաղցիների համար:

Ըստ   նրա՝  եկեղեցական ծիսակատարություններ կատարելու համար գյուղացիները ստիպված էին լինում գնալ այլ համայնքների եկեղեցիներ:

Նա  ավելացրել  է, որ  Սարգսյանների  ընտանիքի   կողմից  վերակառուցված    եկեղեցին՝  հավատի մեջ աներեր մնալու մեծ  հնարավորություն է տալիս իրենց:

Արմատներով արցախցի երգիչ Արսեն Սաֆարյանը ներկա գտնվելով եկեղեցու բացման արարողությանն իր հերթին ասել է, որ ինքը հպարտ և ուրախ  է  նման լավ առիթներով Արցախում լինելու համար:

Նրա խոսքով՝ դարեր շարունակ հայ  ժողովուրդը  միշտ  հաղթել է  զենքով ու հավատով  և   այդպես էլ պիտի հարատևի:

Միջոցառմանը    ներկա  էին Մարտակերտի շրջվարչակազմի ղեկավար Էդգար Հարությունյանը, Սարգսյանների ընտանիքի անդամներ, հարազատներ, հոգևորականներ և համագյուղացիներ: