Բերքահավաքի ենթակա 77 հազար հեկտար աշնանացան ցորու և գարու ցանքատարածքներում մեծամասամբ իրականացվել է բերքահավաք: Այս պահին մնում է մոտ 9000 հա՝ հիմնականում ցորենի ցանքատարածքներ, որոնց հունձը դեռ շարունակվում է:
Անհրաժեշտ է աշնանացան մշակաբույսերի ցանքսը նվազեցնելով կտրուկ ավելացնել գարնանացանի ցանքատարածքները. գյուղնախարար
ՍՏԵՓԱՆԱԿԵՐՏ, հուլիսի 11, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին լրագրողներին հայտնել է ԱՀ գյուղատնտեսության նախարար Ժիրայր Միրզոյանը՝ ներկայացնելով բերքատվության ընթացիկ ցուցանիշները և գրանցված վնասի չափերը:
«Տարին ընդհանուր առմամբ դաշտավարության և բուսաբուծության համար այնքան էլ բարենպաստ չէ: Ունեցել ենք որոշակի կորուստներ՝ պայմանավորված տարբեր վնասատուների և հիվանդությունների առկայությամբ: Սակայն բուսաբուծությանը հասցված ամենամեծ վնասը մայիս և հունիս ամիսներին տեղացած կարկուտներն ու ուժեղ քամիներն են եղել»,- նշել է Ժ. Միրզոյանը:
Գյուղնախարարի խոսքով՝ միայն աշնանացան ցանքադաշտերի հասցված վնասը կազմում է մոտ 10 հազար հեկտար, իսկ ևս 4000 հա ցանքատարածություններ վնասվել են տարբեր աստիճանի:
«Եթե վնասված ցանքատարածքներն այսօրվա բերքահավաքի միջին ցուցանիշներով հաշվարկենք, ապա կարող ենք արձանագրել, որ ունենք 25-30 հազար տոննա ցորենի և գարու բերքի կորուստ: Սա աննախադեպ է վերջին տարիներին՝ բնակլիմայական պայմանների հետևանքով ունեցած կորուստներ շարքում»,- հայտնել է Ժ. Միրզոյանը:
Նախարարը վստահեցրել է, որ բերքահավաքի ավարտից հետո, ցանքադաշտերի վնասի վերջնական չափերը կճշտվեն և կսահմանվեն տուժած հողօգտագործողներին պետական աջակցություն ցուցաբերելու տարբերակները:
Ինչ վերաբերում է գարնանացան մշակաբույսերին, ապա նախարարը նշեց, որ աշնանացանի հետ համեմատ կորուստ քիչ է գրանցվել:
«Մենք պետք է աստիճանաբար՝ պետական աջակցություն ցուցաբերելու և խորհրդատավական աշխատանք կատարելու միջոցով, նվազեցնելով աշնանացան մշակաբույսերի ցանքսը, կտրուկ ավելացնենք գարնանացանի ցանքատարածությունները, քանի որ գարնանացան մշակաբույսերը ավելի բարձրարժեք են և նրանց մի զգալի մասը այսօր վերամշակվում է Արցախում»,-ընդգծեց Ժ. Միրզոյանը:
