Անձնակազմի դաշտային վարժվածությունն ու մասնագիտական ունակությունները կատարելագործելու, ինչպես նաև ստորաբաժանումների ներդաշնակման մակարդակը բարձրացնելու համար Պաշտպանության բանակի ուսուցման գործընթացում տեսականին զուգահեռ մեծ տեղ է հատկացվում գործնական պարապմունքներին: Դրա ակնառու վկայությունը ՊԲ կենտրոնական ենթակայության մի շարք զորամասերի ինժեներասակրավորային ստորաբաժանումների ներգրավմամբ անցկացված ճամբարային հավաքներն էին:
Տղաները գիտակցում են իրենց գործի կարևորությունը
ՍՏԵՓԱՆԱԿԵՐՏ, հուլիսի 12, ԱՐՑԱԽՊՐԵՍ-ՄԱՐՏԻԿ: Հերթական պարապմունքներից մեկի ընթացքում զինծառայողները հրամանատարության կողմից դաշտը ականապատելու հրահանգ են ստանում` գործնականում ցուցադրելով տեսականում ստացած գիտելիքները: Դասակի երիտասարդ հրամանատար, լեյտենանտ Գեղամ Բեջանյանը պարապմունքի ընթացքում ոչ միայն ցուցումներ, այլև նկատված թերությունների վերացման համար անհրաժեշտ պարզաբանումներ է կատարում, որպեսզի յուրաքանչյուրը հստակորեն տիրապետի իր անելիքներին:
«Հակատանկային ականներով ականապատման գործնական պարապմունք ենք իրականացնում: Նպատակն այն է, որպեսզի անձնակազմը վարժվի ականապատման աշխատանքներին, նորակոչիկները ավագ ընկերներից սովորեն մասնագիտական նրբությունները, ձեռք բերեն փորձ, որպեսզի անհրաժեշտության դեպքում կարողանան կատարել իրենց պարտականությունները: Վերադաս հրամանատարությունն իր հերթին շրջում է անցկացվող ուսումնական կետերով, տալիս ցուցումներ, իսկ եթե լինում են անհասկանալի հարցեր, ներկայացնում անհրաժեշտ պարզաբանումներ:
Պետք է ասեմ, որ զորամաս այցելած նորակոչիկների հետ առաջին իսկ օրվանից ուսուցման ակտիվ աշխատանքներ ենք իրականացնում, տեսականորեն բացատրում ամեն ինչ: Սակայն տեսականը միայն գործի կեսն է, իսկ մյուս կեսը կամ իսկական մասնագետների պատրաստումը իրականացվում է դաշտային պայմաններում, որի համար էլ անց են կացվում ճամբարային հավաքներ»,- մեզ հետ զրույցում ասաց դասակի հրամանատար, լեյտենանտ Գեղամ Բեջանյանը:
«Այսօր զինծառայողները հնարավորություն ստացան գործնականում կիրառելու այն գիտելիքները, որոնք նրանք ստացել են ուսումնական փուլի ընթացքում: Այս մասնագիտությունն ընտրած զինծառայողները պետք է հստակորեն իմանան իրենց անելիքները, քանի որ սակրավորին երկրորդ անգամ տրված չէ սխալվել: Ես որպես ավագ ընկեր, ով ունի այս բնագավառում անհրաժեշտ փորձ ու գիտելիքներ, աշխատում եմ դրանք փոխանցել կրտսեր ծառայակից ընկերներիս, որպեսզի ունենանք իրենց մասնագիտությանը հստակորեն տիրապետող զինծառայողներ»,- մեզ հետ զրույցում ասաց սերժանտ Արեն Մակարյանը` հավելելով, որ իրենց մասնագիտությանը տիրապետող զինծառայողների շնորհիվ միայն մենք կարող ենք անառիկ պահել հայրենիքի սահմանները` լինի սակրավոր, թե դիրքապահ:
Տղաները բոլորն էլ քաջ գիտակցում են իրենց գործի կարևորությունն ու մյուս մասնագիտություններից տարբերվող առանձնահատկությունները: Սխալվելու հնարավորությունն այստեղ բացառված է: Հետևաբար ականապատման կամ ականազերծման աշխատանքների իրականացման ժամանակ պետք է խստագույնս պահպանել անվտանգության կանոնները:
Սերժանտ Արեն Մակարյանն ու կրտսեր սերժանտ Զորի Մուսայելյանը նույնպես ծառայողական փորձից գիտեն սակրավորի մասնագիտության դժվարություններն ու առանձնահատկությունները, բայց նաև լավ գիտեն դրանց տեղն ու դերը հայրենիքի պաշտպանության կազմակերպման և հակառակորդի մտադրությունների ձախողման գործընթացում:
Առջևում հաստատված դասացուցակի համաձայն մասնագիտական պատրաստության մյուս պարապմունքներն են: Դրանք հաջողությամբ հաղթահարելով` զինծառայողները հնարավորություն կստանան մասնակցելու ինժեներասակրավորային ստորաբաժանումների ներգրավմամբ նախատեսված զորավարժություններին, որոնք թերևս զինծառայողների համար սեփական պատրաստականության իրական մակարդակը ստուգելու և ցուցադրելու լավագույն առիթը կհանդիսանան: