Շուշիի շրջանի Քարին տակի համայնքում շարունակվում են «Հայաստան» համահայկական հիմնադրամի Ֆրանսիայի տեղական մարմնի ֆինանսավորմամբ իրականացվող արևային ջրատաքացուցիչների տեղադրման աշխատանքները:
Քարին տակում շարունակվում են արևային ջրատաքացուցիչների տեղադրման աշխատանքները
ՍՏԵՓԱՆԱԿԵՐՏ, հուլիսի 25, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Հայաստան» համահայկական հիմնադրամի Ֆրանսիայի տեղական մարմնի ներկայացուցիչ Րաֆֆի Հեքիմյանն ասել է, որ Ասկերանի և Շուշիի շրջաններում տեղադրումներն իրականացնելու համար իրենց կողմից ընդհանուր առմամբ տրամադրվել էր 400 հազար եվրո գումար:
«Արևային ջրատաքացուցիչների տեղադրմանը զուգահեռ` նախագծման փուլում են գտնվում ֆոտովոլտային վահանակները, որոնք ևս պետք է տեղադրվեն առաջիկայում:Ծրագիրը նախատեսված է ավարտել մինչև տարեվերջ: Սա շատ օգտակար է լինելու ընտանիքների համար, քանի որ այն ստեղծելու է հարմարավետություն և խնայողություն: Պատմական դեր ունեցող Քարին տակը մեզ համար առաջին հերթին ծառայեց որպես փորձ: Շատ կարևոր է նաև, որ ջրատաքացուցիչների տեղադրման աշխատանքներին մասնակցում են «Եզնիկ Մոզյան արհեստագործական ուսումնարան»-ի աշկերտները: Կարծում եմ` Արցախում ծրագիրը կշարունակվի»,- մանրամասնել է Ր. Հեքիմյանը:
«Եզնիկ Մոզյան արհեստագործական ուսումնարան»-ի գործադիր տնօրեն Վասպուրակ Կարապետյանն էլ նշել է, որ արևային ջրատաքացուցիչների տեղադրման աշխատանքներին ընդգրկված են նաև ուսումնարանի վարպետները:«Քարին տակ համայնքում նախատեսվում է տեղադրել շուրջ 135 արևային ջրատաքացուցիչներ, որոնցից 22-ի աշխատանքներն արդեն ավարտվել են: Ասկերանի շրջանի համայնքային նշանակության մի շարք կառույցներում ևս աշխատանքներ են տարվում այդ ուղղությամբ:
Ծրագիրն ուսումնական գործընթացի մի մասն է կազմում և մեր աշկերտներին հնարավորություն է տալիս ապագա աշխատատեղերի հարցում խոչընդոտներ չունենալ, քանի որ տեղադրումից հետո, բնականաբար, համակարգերը պետք է նաև սպասարկվեն: Այդ գործընթացում 2 հերթափոխով ներգրավված են 12 աշկերտներ: Նրանցից որոշներն արդեն ինքնուրույն են աշխատում: Յուրաքանչյուր տեղադրված ջրատաքացուցիչի համար աշկերտը ստանում է 6000 դրամ վարձատրություն»,- ավելացրել է Վ. Կարապետյանը:
Իսկ Քարին տակի համայնքի ղեկավար Մխիթար Առուշանյանը նշել է, որ գյուղի ջրամատակարարման հարցը լուծված է դեռևս 2013 թվականից: Տեղադրման հարցերում որևէ տեխնիկական խնդիրներ այդ առումով չեն եղել:«Ծրագիրը համարում ենք դրական, քանի որ ամսվա կտրվածքով բնակիները տնտեսում են միջինը 5000-6000 դրամ բնական գազի համար վճարվող գումարը: Հարկ է ընդգծել, որ տեղադրման ընթացքում մասնագետները բացատրում են համակարգից օգտվելու կանոնները, տրամադրում 5 տարի ժամկետով երաշխավորագիր և համապատասխան փաստաթղթեր օգտագործման կանոնները ուսումնասիրելու նպատակով»,- մասնավորապես ասել է Մ. Առուշանյանը:
