Artsakhpress

Հարցազրույց

Մենք աջակցում ենք բարեփոխումներ անելու Հանրապետության նախագահի կուրսը. Արթուր Թովմասյան

«Ազատ հայրենիք» կուսակցության քաղաքական ուղեգծի հնարավոր փոփոխության, հանրապետությունում վերջերս սկսված ակտիվ քաղաքական խմորումների և այլ հարցերի շուրջ «Արցախպրեսը» զրուցել է Ազգային ժողովի ամենամեծ՝ «Հայրենիք» խմբակցության ղեկավար Արթուր Թովմասյանի հետ:

Մենք աջակցում ենք բարեփոխումներ անելու Հանրապետության նախագահի կուրսը. Արթուր Թովմասյան

Մենք աջակցում ենք բարեփոխումներ անելու Հանրապետության նախագահի կուրսը. Արթուր Թովմասյան
ՍՏԵՓԱՆԱԿԵՐՏ, հուլիսի 26, ԱՐՑԱԽՊՐԵՍ: Հարցազրույցն ամբողջությամբ ներկայացնում ենք ստորև:
- Պարոն Թովմասյան, Խորհրդարանն արդեն գտնվում է ամառային արձակուրդում, հետաքրքիր է՝ ինչպե՞ս եք գնահատում 7-րդ նստաշրջանի ԱԺ և Ձեր ղեկավարած «Հայրենիք» խմբակցության աշխատանքը:
- Կարծում եմ՝ արդյունավետ, քանի որ, ընդհանուր առմամբ, խորհրդարանական գործունեությունն ընթացել է բնականոն հունով: Ընդունված օրենքներից հատկապես կառանձնացնեի «Հավաքների ազատության մասին» ԱՀ օրենքը, կարևոր էր նաև 2017թ.-ի պետական բյուջեի կատարողականի քննարկումը: Բացի նշվածից, ծավալուն աշխատանք է տարվել նաև ԱՀ օրենքները նոր Սահմանադրությանը համապատասխանեցնելու ուղղությամբ:
Հաջորդականության սկզբունքով ԱԺ սոցիալական հարցերի մշտական հանձնաժողովի ղեկավարի փոփոխություն է կատարվել, և խմբակցության անդամ Արամ Գրիգորյանի փոխարեն ընտրվել է խմբակցության մեկ այլ անդամ Արարատ Օհանջանյանը: Իսկ խմբակցությունից և կուսակցությունից Ռուսլան Իսրայելյանի հեռանալուց հետո, ով զբաղեցնում էր ԱԺ ֆինանսաբյուջետային հարցերի մշտական հանձնաժողովի նախագահի պաշտոնը, նույն պաշտոնում ընտրվել է Արամ Գրիգորյանը:
- Ռուսլան Իսրայելյանի հեռանալու հետ կապված թեև բացատրություններ եղան, ի՞նչ ունեք ավելացնելու:
- Ռուսլան Իսրայելյանի հեռանալը թե՛ «Հայրենիք» խմբակցությունից և թե՛ «Ազատ հայրենիք» կուսակցությունից պայմանավորված է եղել իր որոշմամբ, որի մասին հրապարակայնորեն մեկնաբանություն է եղել իր կողմից: Բնականաբար, կցանկանայինք, որ չհեռանար, բայց հարգել ենք այդ որոշումը, և դրանից մեր մարդկային հարաբերությունները չեն տուժել: Միայն կարող եմ ավելացնել, որ նման տրամադրություն մեր խմբակցության մյուս անդամների մոտ չկա:
- Հաջորդ հարցը, կարծում եմ, շատերին կհետաքրքրի: Ի՞նչ է տալիս նոր պաշտոնը կուսակցության նախագահ Արայիկ Հարությունյանին, և պետնախարարի պաշտոնից նրա հրաժարվելուց հետո ի՞նչ է փոխվել կուսակցության քաղաքական ուղեգծում:
- Արայիկ Հարությունյանը մեր քաղաքական իշխանության ամենաթրծված և փորձառու գործիչներից է, ով ղեկավարում է Արցախի ամենամեծ և ազդեցիկ կուսակցությունը: Պետական նախարարի բարձր պաշտոնից նրա հրաժարականը որևէ ձևով պայմանավորված չէր Հանրապետության նախագահի հետ ունեցած որևէ տարաձայնությամբ: Հակառակը, մենք շարունակում ենք պաշտպանել Բակո Սահակյանի վարած քաղաքական կուրսը և մինչև 2020թ.-ը մեր ողջ ներուժը օգտագործելու ենք, որպեսզի Նախագահի հետ միասին ապահովենք նախանշված արդյունքները: Սակայն անկախ պետնախարարի հրաժարականից՝ մեր կուսակցության մոտեցումներում խմբագրումներ են կատարվել վերջին ամիսների իրադարձություններով պայմանավորված, որոնք ավելի օրակարգային դարձրեցին բովանդակային բարեփոխումների անհրաժեշտությունը: Ուստի, մենք աջակցում ենք բարեփոխումներ անելու Հանրապետության նախագահի կուրսը:
Ինչ վերաբերում է Ա. Հարությունյանի նոր պաշտոնի ստանձնմանը, կարծում եմ՝ Նախագահ Սահակյանի կողմից նման առաջարկ արվել է՝ հաշվի առնելով վերը թվարկված հատկանիշները: Պարոն Հարությունյանի հետ մենք շարունակում ենք իրագործել 2015թ.-ին ժողովրդին տված մեր նախընտրական խոստումները՝ պատրաստվելով 2020թ.-ի համապետական ընտրություններին:
- Ինչո՞վ եք բացատրում հանրապետությունում վերջերս սկսված ակտիվ քաղաքական խմորումները:
- Առաջնահերթորեն ՀՀ-ում տեղի ունեցած թավշյա հեղափոխությամբ: Որպես հիմնական պատճառ և հետևանք՝ մենք սա չպետք է շրջանցենք, քանի որ դա, իսկապես, այդպես է, ինչը չի նշանակում, որ նախքան այդ խնդիրներ ու դժգոհություններ չեն եղել: Հայաստանը և Արցախը միևնույն օրգանիզմի տարբեր մասերն են՝ մի տարբերությամբ, որ Արցախն ավելի փոքր է, և մեր իշխանությունները չեն կարող ժողովրդից շատ կտրված լինել: Իհարկե, մեր հանրապետությունում ևս բազմաթիվ չլուծված խնդիրներ կան, բայց մենք միշտ խիզախություն ենք ունեցել դրանց մասին խոսելու: Այդ պատճառով, թեկուզ հայաստանյան հեղափոխական որոշ տրամադրություններ հասան Արցախ, բայց ընդհանուր առմամբ մարեցին, քանի որ առկա խնդիրների վերաբերյալ ժողովուրդն ավելի ռացիոնալ դիրքորոշում ունի:
Այսքանով հանդերձ մենք պետք է գիտակցենք, որ, այնուամենայնիվ, հանրային գիտակցության մեջ փոփոխություն է տեղի ունեցել, և դրան քաղաքական իշխանության արձագանքը պետք է լինի շատ ճկուն՝ հակառակ դեպքում առերեսվելու ենք խորը ճգնաժամի: Ընդդիմության մեջ ևս կան անհատներ, ովքեր մեծ ճանապարհ ունեն անցած, և նախորդ տարիներին հնարավորություն ենք ունեցել Խորհրդարանում աշխատել նրանց հետ: Գուցե տնտեսական կամ այլ ուղղություններում մեր պատկերացումները հաճախ են տարբերվել, բայց ղարաբաղյան հիմնախնդրի կարգավորման հարցում բոլորս մշտապես ունեցել ենք միևնույն սկզբունքային դիրքորոշումը:
Այո, եթե որևէ քաղաքական ուժ գտնում է, որ այսօր իր խոսքը պետք է հանրահավաքների միջոցով ասի, պետք է նրան հնարավորություն տալ օգտվել Սահմանադրությամբ տրված իրավունքներից, պետք է լսել, քննարկումների հարթակ հրավիրել, որպեսզի Խորհրդարանում վերջերս տեղի ունեցած հայտնի տհաճ միջադեպի օրինակը չունենանք: Սա են պահանջում ժամանակակից քաղաքականության ժողովրդավարական կանոնները: Իհարկե, անընդունելի է, եթե նման հարթակներն ընդդիմադիր գործիչները օգտագործեն որպես իշխանության հասցեին անձնական վիրավորանքներ հասցնելու միջոց: Իսկ իշխանափոխության դասական եղանակը, իմ պատկերացմամբ, ընտրություններն են: Այլ եղանակ ես չեմ ընդունում, և, անկախ ցանկությունից և մտածելակերպից, մենք չպետք է մոռանանք, որ ապրում ենք հակամարտության գոտում, և մեր գործունեությունը երբեք չպետք է հասարակությանը պառակտող դեր ունենա: Ինչպես Գարեգին Նժդեհը կասեր՝ կուսակցությանս հետ, բայց ազգիս համար. կարծում եմ. այս սկզբունքը պետք է առաջնորդի բոլորիս:
-Պարոն Թովմասյան, քանի որ խոսք բացվեց, անդրադառնանք նաև ղարաբաղյան հակամարտությանը: ՀՀ-ում տեղի ունեցած իշխանափոխությունից հետո ի՞նչ ունենք այսօր, բանակցային գործընթաց կա՞, թե՞ չկա, վերջապես ի՞նչ սպասել առաջիկայում:
- Այսօր հիմնախնդրի լուծման որևէ տարբերակի քննարկում ես իրատեսական չեմ համարում, քանի որ կողմերի միջև առկա է մեծ անվստահություն: 2016թ.-ի ապրիլին Ադրբեջանի նախաձեռնած պատերազմը բանակցային գործընթացի շարունակումը լուրջ վտանգի տակ էր դրել, բայց ի շնորհիվ ԵԱՀԿ միջնորդ երկրների, այն հնարավոր եղավ փրկել: Պետք է ընդգծել, որ ԵԱՀԿ-ից իմ սպասումները ավելին են, քանի որ այդ կառույցը, բացի միջնորդական ներուժից, ունի նաև հետաքննության լայն հնարավորություններ, որոնց կիրառումը կարող է նվազեցնել լարվածությունը տարածաշրջանում: Սակայն այն գործողությունները, որոնք տեսանելի են ղարաբաղա-ադրբեջանական սահմանին և Նախիջևանի հատվածում, որևէ լավատեսական տրամադրություն չեն ստեղծում: Միևնույն ժամանակ ուզում եմ հայտարարել, որ Ադրբեջանը, այնուամենայնիվ, ինքնուրույն պատերազմ սկսելու ռիսկի չի գնալու, քանի որ թե ՛ 2016թ.-ի դասերը և թե ՛ առավել ևս այսօր մեր բանակի սպառազինությունը և մարտական ոգին հաշվի առնելով՝ Բաքուն չի կարող այդպիսի որոշում կայացնել:
Հարցազրույցը` Անի Ավանեսյանի

     

Քաղաքական

Հասարակական

Ռազմական

Ամենադիտված

ամիս

շաբաթ

օր

Ստեփանակերտը պատրաստ է ընդունել Մեհրիբան Ալիեւային՝ որպես հյուրի կամ պատվիրակության ղեկավարի

Արցախի Խորհրդարանի ամենամեծ խմբակցությունը միացավ ՀՀ Վարչապետի կոչին

Ադրբեջանը ներկայացրել է ԼՂ հիմնահարցի խաղաղ կարգավորման իր տեսլականը

Չեմ կարծում՝ Մեհրիբան Ալիևան իր այդ կարգավիճակով կարող է գալ Արցախ՝ մուղամ լսելու

Աննա Հակոբյանը Մեհրիբան Ալիևային հրավիրել է Արցախ

Արմեն Սարգսյանը ցավակցական հեռագիր է հղել Վլադիմիր Պուտինին

«Զինվորի կերպարը շահարկելով փորձում են միավորներ հավաքել». Ղարաբաղ Տելեկոմ

Արցախում ոչխարաբուծության զարգացման համար խոշորածավալ ներդրումների ծրագրի հաջող մեկնարկը տրված է. Արայիկ Հարությունյան (տեսանյութ)

Ստեփանակերտի որոշ փողոցներում ժամանակավորապես կդադարեցվի գազամատակարարումը

Search