Այսօր՝ հուլիսի 30-ին, Շուշիի Ղազանչեցոց Սուրբ Ամենափրկիչ եկեղեցում Արցախի թեմի առաջնորդ Պարգև արքեպիսկոպոս Մարտիրոսյանի ձեռամբ տեղի է ունեցել N զորամասում ծառայող թվով 61 զինվորների մկրտության հանդիսավոր արարողությունը:
Շուշիի Ղազանչեցոց Սուրբ Ամենափրկիչ եկեղեցում տեղի է ունեցել զինվորների մկրտություն (լուսանկարներ)
ՍՏԵՓԱՆԱԿԵՐՏ, հուլիսի 30, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ պաշտպանության բանակին առընթեր կանանց խորհրդի նախագահ Ռամելա Դադայանն ասել է, որ իրենց խորհրդի հերթական հավաքին մտահղացավ գաղափար՝ զորամասերում սկսել չկնքված զինվորների մկրտության արարողություններ:
«Մեր մտահղացումը ներկայացրինք ԱԺ պատգամավորներին և հասարակության տարբեր խավերին: Արդյունքում բոլորը սկսեցին խրախուսել և աջակցել ծրագրի իրականացմանը: Այսօր զինվորներին կնքահայր լինելու պատասխանատվությունն իրենց վրա են վերցրել ԱՀ ԱԺ պատգամավորներ Արամ Գրիգորյանը, Ռոբերտ Ղահրամանյանը, Արարատ Օհանջանյանը, Էդուարդ Աղաբեկյանը, Վիլեն Սաֆարյանը, Գագիկ Բաղունցը, Արսեն Առստամյանը, արցախյան շարժման առաջամարտիկ Արկադի Կարապետյանը և ԱՀ ՄԻՊ աշխատակազմի դեպարտամենտի ղեկավար Արտակ Բեգլարյանը: Մեր աշխատանքը լինելու է շարունակական: Կարծում եմ՝ կլինեն այլ զինվորներ, ովքեր կցանկանան այդ աստվածահաճո միջոցառման մասնակիցը դառնալ»,- մասնավորապես նշել է Ռ. Դադայանը:
Նրա խոսքով՝ բացի կնքման արարողությունից, շատ կարևոր էր նաև, որպեսզի զինվորները ծանոթանան մշակութային կենտրոն Շուշիին:
«Շնորհակալություն բոլոր նրանց, ովքեր մասնակցել են միջոցառման կազմակերպմանը: Մեր նպատակն է, որպեսզի զինվորներն ունենան հավատ առ Աստված և ժողովուրդ, հույս՝ հայրենիքի ու ապագայի նկատմամբ և սեր՝ մեկը մյուսի հանդեպ: Ամեն անգամ զորամասեր այցելելիս մենք ականատեսն ենք լինում զինվորների կողմից կառուցված մատուռներին, որտեղ նրանք աղոթում են՝ իրենց խնդրանքն ուղարկելով Աստծուն: Կարծում եմ՝ զինվորն իսկապես դրա կարիքը ունի»,- ավելացրել է Ռ. Դադայանը:
«Հայրենիք» խմբակցության պատգամավոր Արամ Գրիգորյանն էլ ողջունել է նախաձեռնությունն՝ ընդգծելով, որ այս քայլն արդեն իսկ իր մեջ ունի խորհուրդ, և ծրագիրը պետք է շարունակական լինի բոլոր զորամասերում:
«Գիտակցելով ամբողջ պատասխանատվությունը՝ որպես կնքահայր՝ պատրաստակամություն ենք հայտնում լինել մեր զինվորների կողքին: Սանիկների հետ կապը միանշանակ լինելու է: Այսօր արդեն հասցրել ենք ծանոթանալ և այսուհետ շփումները նրանց հետ լինելու են էլ ավելի հաճախակի»,- նշել է Ա. Գրիգորյանը՝ հավելելով, որ առաջարկի դեպքում կրկին պատրաստ է լինել զինվորների կնքահայրը:
Իսկ Գոհար Բուդաղյանը, ով N զորամասում ծառայող Վահե Բուդաղյանի մայրն է, մեզ հետ զրույցում ասել է, որ, նախապես տեղեկանալով նախաձեռնության մասին, Գորիսից եկել է Շուշի՝ ներկա գտնվելու որդու մկրտության հանդիսավոր արարողությանը:Գ. Բուդաղյանի խոսքով՝ այսօրվա արարողությունը ևս մեկ անգամ առիթ է, որպեսզի զինվորներն օրհնություն ստանան Աստծո կողմից և ավելի պատրաստակամ լինեն շարունակելու իրենց կողմից հայրենիքին մատուցվող ծառայությունները կատարել:
Միջոցառման ավարտին զինվորները ծաղիկներ են խոնարհել Ստեփանակերտի քաղաքային հուշահամալիրում:
