Ակնայում տեղադրված հուշաքարի կապակցությամբ մի շարք երիտասարդական կազմակերպություններ հանդես են եկել հայտարարությամբ
Վերջին օրերին արցախյան հանրության շրջանում խոր հիասթափություն և անհանգստություն է առաջացրել Ակնայում (նախկինում՝ Աղդամ) Ադրբեջանի ազգային հերոս, Աղդամի գրոհայինների գումարտակի առաջին հրամանատար Ալլահվերդի Բաղիրովի հուշաքարի վերականգնումը մեր որոշ հայրենակիցների կողմից:
Ակնայում տեղադրված հուշաքարի կապակցությամբ մի շարք երիտասարդական կազմակերպություններ հանդես են եկել հայտարարությամբ
ՍՏԵՓԱՆԱԿԵՐՏ, հուլիսի 31, ԱՐՑԱԽՊՐԵՍ: Այս մասին ասվում է Արցախի երիտասարդական, հասարակական կազմակերպությունների տարածած հայտարարության մեջ:
«90-ականների սկզբներին՝ արցախյան ազատամարտի շրջանում, Աղդամն ադրբեջանական բանակի հզոր ռազմական հենակետերից մեկն էր, որտեղից զոր ու գիշեր հրետակոծվում էին ինչպես մերձակա հայկական գյուղերը, նույնպես և մայրաքաղաք Ստեփանակերտը։ Գրեթե անդադար էին այդտեղից իրականացվող ելուզակային հարձակումները հայկական բնակավայրերի վրա, այդ թվում՝ անձամբ Ալլահվերդի Բաղիրովի և նրա գլխավորած գումարտակի անմիջական մասնակցությամբ։ Արցախահայության՝ ցեղասպանությանն ուղղված այդ բարբարոսական գործողությունների հետևանքով հարյուրավոր հայ խաղաղ բնակիչներ են զոհվել՝ երեխաներ, կանայք ու ծերունիներ։ Ի վերջո, Արցախի ինքնապաշտպանական ուժերին 1993թ. հուլիսի-22-23-ին հաջողվեց փայլուն ռազմագործողության արդյունքում՝ հայ քաջորդիների արյան ու կյանքի գնով իսպառ չեզոքացնել թշնամու «գայլաորջ» դարձած այդ հենակետը։
Եվ հիմա մեր ինչ-ինչ հայրենակիցներ, այսպես կոչված, «մարդասիրական մղումներից դրդված» փորձում են վերականգնել հայ բնակչության սպանդի կազմակերպիչ դահիճներից մեկի հուշաքարը։
Մենք՝ Արցախի Հանրապետության հասարակական կառույցներս, խստիվ դատապարտում ենք այդ հակազգային քայլը՝ որակելով այն որպես հայ ժողովրդի ազգային ինքնասիրությունը, պատիվն ու արժանապատվությունը վիրավորող, Հող հայրենիի ազատագրությանն իրենց կյանքը նվիրաբերած մեր հերոս նահատակների հիշատակի անարգմանն ուղղված իրողություն։
Ադրբեջանում առայսօր պետական և հասարակական մակարդակներով շարունակվում է հայատյաց քաղաքականությունը։ Պղծվում, ջարդվում, ոչնչացվում են հայկական շիրմաքարերը և պատմամշակութային հուշարձանները: Ի տարբերության՝ Արցախում պետական ու հանրային հոգածության տակ են գտնվում մահմեդական հոգևոր նյութական արժեքները, այդ թվում՝ Շուշիում և Ակնայում առ այսօր մնայուն մզկիթները, որոնց տարածքում կանգուն են ադրբեջանական գերեզմանաքարերը, աշխատանքներ են տարվում, մասնավորապես, Շուշիի պարսկական մզկիթի վերականգնման ուղղությամբ։
Միևնույն ժամանակ, մենք միանգամայն օրինաչափ ու տրամաբանական ենք համարում, որ մեր մի խումբ հայրենասեր երիտասարդներ, որոնցից շատերի հարազատները նահատակվել են Ազատամարտում, ի պատասխան ջարդել են այդ տխրահռչակ հուշաքարը: Անկասկած, նրանց այդ վարմունքը զուտ արժանապատվության և ինքնասիրության արտահայտություն էր։ Եթե հարևան երկրում չկա հայ ժողովրդի նկատմամբ հանդուրժողականության որևէ նշույլ, ապա ինչ խոսք կարող է լինել մեր կողմից նույն այդ հանդուրժողականության դրսևորման մասին»,- նշվում է հայտարարության մեջ:
Հայտարարության տակ ստորագրել են
«Հայկի Սերունդ» ՀԿ
«ԱԱՄ «Հայրենյաց Պաշտպան» ԵԿ
«Երիտասարդ մարդկանց քրիստոնեական ընկերակցություն Արցախ» ՀԿ
«Արցախի երիտասարդության զարգացման կենտրոն» ՀԿ
«Առաջ Արցախ» ՀԿ
«Միացյալ Հայաստան» ՀԿ
«Հանուն Հայրենիքի» ՀԿ
«Իրազեկ սերունդ» ՀԿ
«Երիտասարդական հանրային հետազոտությունների կենտրոն» ՀԿ
Հիշեցնենք, որ օրերս համացանցում հրապարակվել է մի տեսանյութ, ըստ որի՝ Արցախում որոշ մարդկանց կողմից մի քանի օր առաջ տեղադրվել է արցախյան պատերազմի ժամանակ ադրբեջանական բանակի Ակնայի (Աղդամի) ճակատի հրամանատարներից Ալահվերդի Բագիրովի, ով նաև Ադրբեջանի հերոս է, հուշաքարը։ Նախաձեռնության հեղինակներից Արցախի ինքնապաշտպանակն ջոկատների առաջին շտաբի պետ (1988-89թթ.), այնուհետև Կենտրոնական պաշտպանական շտաբի պետ, «Մարտական խաչ» շքանշանի ասպետ Ռազմիկ Պետրոսյանը հայտարարել է, թե ադրբեջանական վանդալիզմի ֆոնին այս հուշաքարի առկայությունը նաև հայերի հանդուրժողականության մասին է վկայում: Նա նաև նշել է, որ հուշաքարը տեղադրվել էր դեռևս 1994 թվականին, իսկ հիմա ուղղակի թարմացվել է: Տեղադրված հուշաքարը երկար կյանք չի ունեցել, այն ոչնչացվել է երիտասարդների կողմից: